Ka Kong Angela Rngad pyrshah ïa u Myntri Sorkar, u Bah Kyrsoi Pyrtuh pyrshah ïa u MLA

Shillong, Naitung, 21: Ki arngut ki nongïalam ba hakhmat jong ka Thma u Rangli Juki (TUR) kiba kynthup ïa ka Kong Angela Rngad bad u Bah Kyrsoibor Pyrtuh ha ka sngi Palei ki la pynbna paidbah ba kin rung sha ka jylli jong ka saiñpyrthei na ka bynta ban aireng ha ka elekshon sha ka Ingdorbar Thawaiñ jong ka Jylla ka ban sa long ha u snem 2023.
Ha ka jingïakren bad ki lad pathai khubor ka Kong Angela Rngad ka la pynbna ban ïakhun kum ka kyrtong shimet na South Shillong Constituency katba u Bah Kyrsoibor Pyrtuh u la pynbna ban ïakhun kum u kyrtong shimet na North Shillong Constituency na ka rynsan jong ka KAM.
Ka Kong Angela Rngad kan ïakhun pyrshah ïa u Myntri ka Sorkar Jylla u Bah Sanbor Shullai uba la mihkhmat ïa ka South Shillong Constituency naduh u snem 2008 haduh mynta.
Katba u Bah Kyrsoibor Pyrtuh un aireng pyrshah ïa u MLA ba mynta jong ka KHNAM u Bah Adelbert Nongrum uba dang mihkhmat ïa ka North Shillong Constituency.
Kine ki arngut ki nongtrei mon sngewbha ba pawkhmat ha kane ka jylla ki la pynpaw ba la pynkha ïa ka KAM na ka jingïaksaid bad na ka jingshah knieh noh ki hok jong ki nongtrei bad nongbylla sngi.
Ki la ïathuh ba ka kynhun kaba ki la pynkha kum ka KAM kan ieng na ka bynta ban ïada ïa ka khyndew ka shyiap bad na ka jinghiar arsut jong ka pule ka puthi, ka koit ka khiah, ka jingshah pynjot ka mariang bad kiwei kiwei.
“Ngi khot bad wer ïa ki paidbah ban ïatreilang ban rat dyngkhong ïa ka bamsap ka bampong bad ka jingleh kuman jong ka Sorkar ïa ki jingdawa jong ki nongtrei nongbylla,” ong ka Angela Rngad.
Ka la kynthoh ruh ba haduh mynta ka Sorkar kam shym la thaw ïa ka polisi na ka bynta ki nongbylla bad dei kane ka jingshakri ïa ki nongbylla mynta la ar phew snem kynthih kaba la pynlong ïa ka ban rung sha ka jylli jong ka saiñpyrthei da kaba thaw ïa ka KAM na ka bynta ban wanrah ïa ka jingsynshar kaba khuid.
“Ngi kwah ban pyni da ki kam namarba ka jylla Meghalaya mynta ka la sahdien shaba palat. Lada phai sha ka pule puthi ruh ka la hiar arsut, ïa ka koit ka koit ruh kam don kano kano ka jingpynkhreh lypa kumba la jia ha ka por ba la wan lynshop ka jingpang khlam COVID-19. Kane baroh ka dei namarba la bam kruiñ ka bamsap bampong bad ka jingpyndonkam bakla ïa ka bor,” ka la ong.
Haba pynpaw ba ka pisa kam dei ban long ka bor ha ka por Elekshon, ka Kong Angela ka la ong, “ngim don eiei sha lyndet bad sha kynriang. Ngi ñiewkor ïa iwei pa iwei i nongshong shnong ka jylla bad ngim ngeit hi ruh ba yn shu thied ïa ki paidbah da ka pisa namarba lada ngi shah thied da ka pisa, uba thied ïa ngi ruh un shah thied kylla bad ïa ka sur jong u paidbah yn sa set noh. Ngim dei ban shah ïa ka imlang ka sahlang ban don ka jingïashah liang. Ngi ngeit ha ka jingbishar kaba hok.”
U Bah Kyrsoibor haba bynrap, u la ong ba ka jingïakhun kan long ïa ki jingkylla kiba don jingmut, ban peit ba ka miej bamja jong ki longiing longsem ka dei kaba dap bad ba ki khun ki kti jong ki paidbah nongshong shnong kin ïoh ïa ka pule ka puthi ka babha bad ka koit ka khiah kaba bha.
“Ki paidbah ha ka shnong Mawkhar, Jaïaw bad ha baroh kawei ka Constituency ki dei kiba la nang la stad bad kiba la don la ki jong ki jong ki kyrdan bapher bapher bad kiba lah ban pynshong nongrim,” u la ong.
Shuh shuh u la ong ba kum ka KAM kum ka rynsan ka ban mihkhmat ïa u paidbah paidlang kan pynphai ïa ki khmat na ka bynta ban pynurlong ïa ki jingphoh sniew kaba ki la angnud baroh shikatta.