Jur ka jinghap slap, maham ka bor District Ri-Bhoi ïa ki nongwan jngohkai pyrthei ban phikir

Nongpoh, Naitung 08: U Deputy Commissioner bad Chairman ka DDMA, Ri-Bhoi District, u la pynmih ïa ka jingmaham paidbah na ka bynta ki nongwan jngohkai pyrthei kiba leit sha ki jaka jngohkai bapher bapher ha kane ka aiom slap, bad kyrpad ruh ïaki paidbah ban phikir bad ban shim ïaki lad jingïada ban lait na kino kino ki jingjia ba sngewsih.
Naka liang ka bor district ka kyntu ïa baroh ki nongwan jngohkai ba kin long kiba husiar bha haba leit sha ki wah, ki pung, bad kiwei kiwei ki jaka shangkai bad jaka jngohkai ha kum kane ka aiom slap.
La kyrpad ruh ïa ki nongwan jngohkai ba kin phong ïa ka life jacket haba don hajan ne ha um, bud ryntih ïa baroh ki jingbthah, ki lad jingïada bad ki jingmaham ba la pynbna bad ban peitngor ïa ki khynnah ha man la ka por bad khamtam ki dei ban peit lypa ïaka jinglong jingman ka suiñ bneng shuwa ban pynbeit ïaka jingleit shangkai.
La kyntu ruh ïa ki paidbah ba kin burom ïa ka kolshor bad ki riti dustur jong ki trai shnong, bret ïa ki jaboh ha ki jaka ba dei ban bret, rah ïa ka um dih bad ki tiar kiba donkam, bad ïatreilang bad ki bor synshar, ki nongïalam lynti bad ki kynhun jingïarap haba donkam. Kito kiba leit sha ki jaka ba jngai ki dei ban pyntip lypa ïa ki bahaïing hasem ne ki paralok halor ka jaka leit jong ki bad lada don kano kano ka jingjia kyrkieh, dei ban phone mar mar sha u number 112.
Ki bor district kila maham ruh ïa ki nongwan jngohkai ba kim dei ban jngi ha ki jaka ba la khang ne kiba ma haba slap jur, ne haba don ka jingshlei um, ne ban pynjulor ïa ka mariang, lane buh jingma ïa la ka jingim tang na ka bynta ban shon dur hajan ki bynta ba ma kum halor maw bad harud um.
Namarkata ki paidbah ki dei ban kiar na ka leit shangkai haba la pynmih ïa ki jingmaham shaphang ka jinglong jong ka suiñbneng bad ban nym leit hajan ki wah, bad ki pung ha ka por slap ne hadien ba la kut ka jinghap slap namar ka um ka lah ban kiew sted ha kano kano ka por bad ka lah ban buh jingma ïa ka jingim.
Na ka bynta kino kino ki jingjia kyrkieh, ka bor district ka la pynbna ruh ïa ki number jingïarap kyrkieh kiba kynthup ïa ka Deputy Commissioner’s Office Helpline- 8131811911, ADC & CEO, District Disaster Management Department- 8575093625, District Disaster Management Officer- 9485005523, District Control Room- 6009906348, Police Control Room- 6909300160, Nongpoh Control Room- 8730940080 / 9856084514, bad ka Emergency Helpline- 112.