Shen yn sdang ka MSSAT ïa ka Social Audit ïa 12 tylli ki skhim shwa ban aiti ïa ka kaiphod sha ka Sorkar
Shillong, Naitung 8 : Ka Meghalaya Society for Social Audit and Transparency (MSSAT) kan sdang ïa ka jingleh Social Audit ba shisien shisnem jong u snem mang tyngka 2026-27 naduh ka 8 tarik Naitung, da ka jingthmu ban wanrah ïa ka jingtreikam kaba shai bad ba don jingkitkhlieh ha ka jingpyntreikam ïa ki skhim ha kylleng ka Jylla.
U Director ka MSSAT u bah J Pyngrope ula ong ba kane ka jingleh Audit ka dei kaba la pynwandur ban pynthikna ba ki prokram ba Sorkar ki poi hok sha ki paidbah ba la thmu bad ba ïa ki pisa paidbah la pyndonkam thikna.
“Ka Social Audit ka shim ïa ka bynta kaba kongsan ban pynthikna ba ki skhim ka Sorkar ka poi sha ki nongïoh bynta kiba thmu bad ba ka pisa ba la mang jong kine ki prokram la pyndonkam bha” ula pynpaw.
Kane ka kam kan sdang da ka jingïalang bad ki Tnad bad ka jingpruid dak ïa ka audit calendar. Ki kynhun kin sa ïaid sha man ki shnong ban pynthikna na man ki thliew ïing, ka jingjurip ïa ki jaka bad ka jingkhmih bniah ha ki jaka treikam.
ïa kane yn pynbud da ka jingïakren jong ki kynhun bad ki Social Audit Gram Sabhas ba kin lum ïa ki jingtip beit beit na ki shnong ki thaw.
ïa ki jingshem yn sa rah hakhmat ki Ophis ha ki Block Social Audit Public Hearing, ha kaba ïa ki jing sngewkhia yn sa pynbeit mar mar ha katei hi ka jaka.
ïa ka Action Taken Report ba la pynkhreh hadien kine ki hearing yn sa aiti sha ka MSSAT, ban sa pynkhreh bad phah ïa ka Annual Social Audit Report sha ka Sorkar Jylla.
Ha ka wat ba nyngkong jong u snem mang tyngka, ka audit kan khmih ïa ka jingpyntreikam jong ki 12 tylli ki skhim ba kongsan ba kynthup ïa ka MGNREGA, NSAP, Sarva Shiksha, PDS, PM Poshan, PMKSY, RDSS, the Special Livestock Production Programme, Blue Revolution, Jal Jeevan Mission, MOVCD-NER bad Rainfed Area Development.
U bynrap ba ki audit ym tang ba ki ïarap ban lapdien ïa ka jingïaid jong ki skhim hynrei ki synniang ruh sha ka jingjop ha ka jingpynyreikam da kaba pynthikna ïa ki jingmyntoi sha ki paidbah.
Ka MSSAT ka khot ïa ki nongïoh bynta, ki riew paidbah bad ki nongpyntreikam ïa ki skhim ba kin ïashim bynta shitrhem ha ka ban pynlong ïa kane ka kam kaba don jingmut.