Pynwai noh ka ïingbishar High Court ïa ka PIL u MLA ka VPP halor ka bhah pule ka Jylla ha ka Higher Education

Shillong, Naitung 8 : Ka Meghalaya High Court ha ka sngi Ba-ar ka la ailad ïa u MLA ka VPP na North Shillong Bah Adelbert Nongrim ban weng noh ïa ka PIL ba tynjuh pyrshah ïa ka State Reservation Policy na ka bynta ki Central Quota seat ha ka higher education, hadien ba la pyntip sha ïing Bishar ba ka mudui kam shym la ïaid kat kum ka PIL Rules ba donkam ban bud.
Ka Division Bench ba kynthup ïa ka Chief Justice Revati Mohite Dere bad Justice W Diengdoh ka la pynwai noh ïa ka PIL kum kaba la weng noh, haba ai lad ïa u nongmudui la un ai da ka jingthoh sha ki bor ba dei khmih lane file ïa ka mudui ba thymmai kaba ïaid kat kum ka rule.
Haba sdang jong ka jingbishar, u Advocate General A Kumar ula pyntip ba ka “PIL bala mudui da u nongujor kam dei kaba ïaid kat kum ka PIL Rules, kaba long kongsan ban bud”.
Namar kane, u nongïasaid aiñ jong u nongmudui u P Yobin ula pan jingmut ban weng noh ïa kane ka mukotduma.
“Ngi pan jingbit ban weng noh ïa ka jingmudui da ka jinglaitluid ban phah da ka jingthoh sha ki bor ba dei khmih, kat kaba I donkam, lane ban mudui da ka ujor ba thymmai kaba long thik kat kum ka PIL Rules” ong u nongïasaid. Ka ïing Bishar ka la pdiang ïa kane ka jingkyrpad bad ka la pynwai noh ïa kane ka PIL.
U Bah Adelbert ula mudui ïa ka PIL ba buh jingkylli ba kumno ka Sorkar Jylla ka sam ïa ka bhah pule jong ka Central Pool na ka bynta ki jingpule MBBS, Engineering bad Agriculture.
Kat kum ka jingujor, ka Jylla ka khot aplikeshon ïa kine ki seat pule bad sam ïa ki da kaba pyntreikam ia ka Meghalaya Job Reservation Policy.
U Bah Adelbert ula pynksan ba ka jingpyndonkam ïa ka Job Reservation Policy na ka bynta ka jingpule khlem ki aiñ kiba kyrpang ka long kaba beaiñ.