Sha USA yn leit aireng u samla Kitkupar Nongsiej ha ka rynsan pyni sap ba pawnam jong ka WCOPA

Shillong, Naitung 08: Ka Don Bosco Media Network (DBMN), Shillong ha ka sngi Balang ka la pynlong ïa ka jingïalang kitbok bad jingïaduwai kyrpang na ka bynta u samla Kitkupar Nongsiej, uba long u nongjop jong ka – Ka Sur Kynud Season-3, shuwa ba un leit aireng sha United States of America ban mihkhmat ïa ka Meghalaya bad ka ri India ha ka World Championships of Performing Arts (WCOPA) 2026 kaban long ha Las Vegas, Nevada.
Katkum ka prokram, u Kitkupar un mih na Shillong ha ka 10 tarik Naitung, katba ka jingïakob kan long naduh ka 13 haduh ka 21 tarik Naitung, 2026, ha Las Vegas, Nevada. U kpa jong u,u Bah Aibari Kupar Syiemlieh, un synran lang ïa u ha kane ka jingleit.
Haba kren ha ka jingialang u Director ka Don Bosco Youth Centre, Rev. Fr. Michael Makri u la ong ba ka jingshah jied jong u samla Kitkupar Nongsiej ka la dei ka burom ym tang ïa ka iing ka sem hynrei khamtam ïa ka jylla bad ïa ka ri India baroh kawei kaba u hap ban mihkhmat ha kane ka lympung kaba heh bha ha ka pyrthei.
“Kynmaw ba kine ki jingai ba phi ïoh dei kiba wan na u Blei, ym dei i Mei i Pa ne na kaYyouth Centre ne na ki Phadar hynrei dei ka jingaiei jong u Blei. Haba phim klet ïa u Blei phin sa nangkiew shuh shuh ha ka kam jong phi.
Kynmaw ruh ba phi leit ym dei tang na bynta ïalade ïa ka ïing ka sem, hynrei na ka bynta ka Jylla bad ka ri baroh kawei,” u la ong.
Katkum ka jingong jong u Director ka Youth Centre, kane ka dei ka sien kaba nyngkong eh na India ban ïoh leit aireng ha katei ka rynsan kaba pawnam.
Ha kajuh ka por, u Fr. Makri u la pynpaw ka jingsngewnguh ïa ka jingkyrshan borbah jong u Provincial, Rev. Fr. John Zosiama, u la long kum u kongsan ha kane ka jingïalang kitbok.
Katba na ka liang u Fr. Provincial ha ka jingkren u la ai ka jingïaroh ïa ka Youth Centre kumjuh ïa ka Don Bosco Media Network hapoh ka jingpeit jong u Fr. Michael Makri bad Fr. Ritonbor Kharkongor kiba la lah pynlong ïa bun ki prokram na ka bynta ban plie lad ïa ki khynnah bad ki khun samla ha ki liang bapher bapher khamtam haba ïadei bad ki sap ba kyrpang ba ki don.
U ong ruh ba u soh jong kane ka jingtrei borbah ka la pynlong ia u samla Kitkupar Nongsiej ban ïoh ïa katei ka kabu ksiar ban mihkhmat ïa ka Jylla bad ïa ka Ri haduh katei ka lympung kaba heh tam ha ka pyrthei.
“Ai ïa kaba bha tam haba phi leit ban aireng ha katei ka lympung kaba heh jong ka pyrthei,” u la ong.
Na ka liang u Pastor AI Kharshiing ha ka jingkren ba lyngkot u la ka jingïaroh ïa ka Youth Centre bad DMBN kiba la lah ban pynbit pynbiang bad plie ka lad ka lynti ïa u samla Kitkupar haduh ba un da poi shaduh katei ka kyrdan.
Katba na ka liang u samla Kitkupar u la pynpaw ka jingsngewnguh ïa ka jinghikai kaba u la ïoh na ki rynsan ïakob rwai ba pynlong da ka Youth Centre bad Don Bosco Media Network. “Ki jinghikai ba nga ïoh nangne ki la ïarap ba ngan lah ban pyntbit shuh shuh ïalade bad khamtam ban wanrah ka jingsngewskhem bad shaniah ïalade. Kumta nga kwah ban ai khublei ïaphi baroh kiba la ïarap ïanga,” u la ong.
Lah ban kdew hangne ba kane kam dei shuh ka sien kaba nyngkong ïa ka DBMN bana ka la kyrshan ïa ki nongjop jong ka Ka Sur Kynud. Ka Chevinia Lyngdoh Mawnai, kaba la jop ïa ka Ka Sur Kynud Season-1, ka la mihkhmat ïa ka India ha ka UK Vocal Star Competition ha Ri Bilat bad ka la rah ïa ka nam lahduh.