Mynjur ka sorkar ïa ka Bill ban tehlakam ïa ki kynhun ba ai ram pisa sha ki paidbah

Shillong, Naitung 1 : Ka Kynhun Myntri ka Sorkar Jylla ha ka sngi Ba-ar ka la ai jingmynjur ïa ka Meghalaya Money Lenders and Accredited Loan Providers Bill, 2026, ban teh lakam ïa ka jingairam shimet ne kynhun bad ïada ïa ki nongshim ram na ka jingshah khniot, ong u Myntri Rangbah ka Jylla.
Ka Kynhun Myntri kala ai jingmynjur ruh ïa ka Meghalaya Banning of Unregulated Deposit Schemes (BUDS) Rules, 2026, bad mynjur ïa ka jingpynkiew kyrdan ïa u A. Sangma kum u Legal Remembrancer & Secretary, ka Law Department.
“Ka kynhun Myntri ka la ai jingmynjur ïa ka Meghalaya Money Lenders and Accredited Loan Providers Bill, 2026,” ong u Conrad haba ïakren bad ki nongthoh khubor hadien ka jingïalang.
“Kane ka aiñ ba thymmai ka buh ïa ka kyndon ba ki dei ban pynrung kyrteng ban teh kyndon ïa ki nongai ram shimet lyngba ki Deputy Commissioner, ka ban pynthikna ïa ka jingairam kaba shai, ïada ïa ka jingkhniot beiñ bad ïada ïa ki nongshim ram na ka jingshah oh sut kaba heh” ula ong.
“Kane ka dei ka sienjam kaba donkam ban shim ram da ka jingkitkhlieh bad ka jingïada ha ka liang ka pisa pilaiñ ïa ki nongshong shnong ka Meghalaya” bynrap u Myntri Rangbah.
Ka Kynhun Myntri ka la pynmih ruh ïa ka jingpynbna ïa ka Rules hapoh ka BUDS Act ka Sorkar Pdeng.
“La mynjur ïa Meghalaya Banning of Unregulated Deposit Schemes (BUDS) Rules, 2026,” ong u Conrad.
“Kine ki rules la thaw da ka Sorkar Jylla hapoh ka BUDS Act ka Sorkar India ban pynkhlaiñ ia ka jing pyntreikam ha Meghalaya bad pynkhlaiñ ïa ka jingïada ïa ki skhim thep pisa kiba khlem teh kyndon” ula ong.