Ladep ai ki shipai ïa ka jaka ban pynheh surok 4 Lane na Rilbong sha Barik ap jingmynjur na Delhi

Shillong, Naitung 1: Ka jingtyrwa ban shna ïa ka surok 4 Lane na Rilbong sha Barik kan sa urlong noh shen hadien ba ki shipai ki la pdiang ïa ka jingtyrwa jong ka Sorkar Jylla, ong u Myntri Rangbah ka jylla u Conrad K Sangma haba bynrap ba shen un sa leit ïakynduh ïa u Myntri ka Ministry of Road Transport ka Sorkar Pdeng Nitin Gadkari ha Delhi ban ïoh ïa ka jingmynjur kaba khatduh
U Conrad u la ong ruh ba ka Jylla ka dang pynkhreh ban ïoh ïa ka surok 4 Lane na Umiam–Shillong, ka ban kynthup ïa ka surok rim ba la don mynta bad ka surok thymmai (Greenfield) ban pynsuk ïa ka leit ka wan sha nongbah Shillong.
“Ngan sa ïakynduh ruh ïa u Nitin Gadkari ha kane ka jingleit jong nga sha Delhi. Kane ka long, shisha, kaba ïahap bad ka jingwan jong u sha Shillong dangshen”, la ong u Myntri Rangbah ka Jylla.
U la pynkynmaw ba une u Myntri ka Sorkar Pdeng ula pynbna ïa katto katne ki projek ha ka jingwan sha Shillong.
“Lada phi kynmaw, ki la don shibun ki projek thymmai kiba u la kular, hynrei katto katne ki projek ki dei kiba dang donkam ban ïakren kham bniah, kynthup ïa ka surok 4 Lane na Rilbong sha Barik” ula ong.
Ban pynurlong ïa ka ïaid projek 4-lane na Rilbong–Barik, ka Sorkar ka la pynlong ïa ka jingïalang bad ki tnat ba kongsan. “Nga la shong ïa ka jingïalang kaba bniah bad GOC, NHIDCL, PWD, ki bor district, bad baroh kiba don bynta”, u la ong.
“Ka jingthmu jong kata ka jingïalang ka long ban weng noh ïa ki jingeh ki ban khang lad ïa kane ka Project. Watla baroh ki ïa mynjur lang, kine ki dei ki mat kiba bniah kiba ngi donkam ban ïakren sani bha bad kumta ngi la ïoh ïa ka jingïalang ba seisoh” u la bynrap.
U Myntri Rangbah u la ong ba ka jingmynjur jong ki shipai ka long kaba kongsan bha bad mynta la lah ban pynthikna. “Ngi la poi sha ka jingïasngewthuh jingmut. Shisien ba ki shipai ki la ïohi ïa kaei kaba la pynkhreh kaba ngi la don, ki la pdiang bad ki la ai ïa ka jingbit ban ïaid shakhmat iaka surok” u la ong.
Katkum ka jingong u Myntri Rangbah, u Gadkari u la kular ban ïarap mang pisa na ka bynta ka surok tang lada ïoh NOC na ki shipai.
“U Myntri Sorkar Pdeng u la ong ba u kloi ban ai ïa kane ka project surok 4 Lane tangba dei ban ïoh NOC na ki shipai, bad kumta, ngi la trei shitom bha bad ngi la ïoh” ula ong.
“Nga sngew kmen haduh katta katta ba ngi la lah ban wanrah ïa ka. Hooid ngi hap ban ap ïa ka rai ba khatduh na Delhi, hynrei ngi dang pynkhreh ïa kata” ula ong.
“Bad nga kyrmen shibun ba ha kane ka jingleit sha Delhi, ngin sa lah ban rah ïa kane ka projek sha u Myntri Sorkar Pdeng ban ïoh ïa ka rai kaba thikna,” u la bynrap.
Halor ka surok 4 Lane Umiam–Shillong, u Conrad u la ong ba ka jingpyrkhat ka long ban pynkham suk ban rung shapoh ka nongbah Shillong.
“Ka projek kaba ar kaba nga la bishar bniah ka dei kaba ïadei bad ka surok 4 Lane na Umiam sha Shillong. Shi bynta kan long ban pynïasoh lang daka surok thymmai (Greenfield), shi bynta kan long naka surok rim (Brownfield). Ka jingmut ka long ban wanrah ïa ka ïaid ka ïeng kaba kham suk haba rung sha Shillong, ngi don ka jingkyrmen ba ngin ïoh ïa ka rai kaba bha na ka Sorkar India” u la ong.
U Myntri Rangbah ula ong ba kane ka mat kam dei kaba suk naduh ba ka dang don haka jingïakren.
“Kumta, ngam shym la lah, hooid, kumba nga la ong ki la don shibun ki jyrwit jyrwat kiba donkam ban pynbeit. Ka jingpynbeit ryntih ka dei kaei kaei kaba —ha ki katto katne ki jaka ka NHIDCL ka mynjur, bad ha ki katto katne ka PWD ka ong ba ngim don ïa ka jaka hangne, ngi ïakynduh shibun ki jingeh” ula ong.
“Kumta nga kyrmen shibun ba ha kane ka jingleit sha Delhi, ngin sa ïoh ïa ka jubab kaba kham shai bha naka Sorkar Pdeng halor kaei kaba ngi leh,” ula bynrap.