Iehnoh kam ki nongïalam ka HITO-Jaiñtia Hills, Ksehrynshang Circle bad Lakaseiñ Unit

Jowai, Naitung 01: Ki nongïalam ka Hynñiewtrep Integrated Territorial Organisation (HITO)-Jaiñtia Hills kynthup ïa u Burom Dkhar (President), u Presmi Suting (Assistant Secretary), u Fasterwell Phawa (Sport secretary), u Eddy Jeferson Tang (Organising secretary), u Deibormi Siangbud (former President Jowai Circle), u Deibor Pakem (President Lakaseiñ Unit) u Lidar Papiah (Secretary Ksehrynshang Circle), Edimian Dkhar (Jaiñtia CEC Member), Yoomiki Pasah (Jaiñtia CEC Member) bad baroh ki dkhot ka Ksehrynshang Circle bad Lakaseiñ Unit ha kane ka 30-06-2026 kila phah ïa ka shithi ïehnoh kam sha u President bad Secretary ka sengkmie (Central Body).
Katei ka jingïehnoh kam jong ki kim shem la pynpaw kano kano ka daw, hynrei ki ai ka jingkitbok kitrwiang ïaka sengkmie ban kan nangkiew haki kam babha jong ka kumjuh ba kin nanglah shuh shuh ban shakri ïaka imlang ka sahlang ha ki kano kano ka kam naka bynta u paidbah ka bri u Hynñiewtrep, la pynkut ka kyrwoh na u President-JH u Burom Dkhar.