Rai ka Sorkar ban buh ïa ki Unified Command ka ICCC ha manla ki sor heh

Shillong, Jylliew 30 : U Myntri Rangbah ka Jylla Conrad K Sangma ha ka sngi Ba-ar ula pyntip ba ka Jylla kan sa buh ïa ka Unified Command hapoh ka jingkhmih u Director lane CEO ban pynjanai ïa ka jingïatreikam lang hapdeng ki Tnad da kaba pyndonkam ïa ka Integrated Command and Control Centre, haba shim nuksa ïa ka rukom treikam (model) na Hyderabad kaba pynkloi ïa ka jingai jingshakri da ka jingïoh kloi ïa ki data bala pynïasoh hapdeng ki drone, camera bad ka jingshakri ha ka koit ka khiah.
Haba pynïaid ïa ka jingïalang bishar kam bad ka kynhun ICCC, u Conrad ula ong ba ka tnad Pulit, IT, Urban Affairs, Municipal bad kiwei ki Tnad kila sdang ïa ka jingïatreilang ha ka ICCC.
“Ka Tnad Pulit, ka Tnad IT, ka Tnad Urban Affairs, ka Municipal bad ki tnad bapher bapher ki la i\treilang bad ka ICCC ka la ïarap bha ïajan baroh ki Tnad kiba ïatreikam hapoh ka ICCC hynrei ka thong jonng ngi ka long ban khmih ba kumno ngin nang lah ban pynjanai ïa ka jingtreikam ka ICCC bad pynlong ïa ka kaba kham treikam bha” ula ong.
U Myntri Rangbah ula ong ba u ihun shisha ban peit ïa ka ICCC ka Hyderabad kaba ula wan jngoh ha ki khyndiat sngi bala leit, khamtam ka jingpynïasoh lang ïa ki field unit bad ka Control Room.
“La ka dei ka jingïasoh ne ka jingïatreilang hapdeng ki drone ba ki don bad ka jingpynïasoh ïa ki drone sha ka ICCC, la ka dei ki microphone bapher bapher bad ki speaker ba ki don, ki lah ban ai ïa ka hukum beit beit sha kiba don ha ka ICCC sha ki Police Point kaba ki kwah ban phah ïa ka khubor lyngba ki speaker – Kum kane ka micro management la leh ha ka Jylla kum ka Telangana” ula ong.
U Conrad ula ai nuksa na Telangala ha kaba ïa ki video aksiden la phah mar mar sha ka Tnad ka Koit ka Khiah, kaba pyntip pat mar mar sha ki hospital ba marjan bad phah ïa ki ambulance ban pynkit ïa kiba mysaw.
Ban pyntreikam lang ïa kane, ka Jylla kan thaw ïa ka rukom treikam kaba paka ka ban pynïasoh ïa ki tnad bapher bapher bad ailad ïa ki ba kin ïatreikam lang ha ka rukom kaba dei. “Ka jingïalang kala ïakren ïa ka jingbuh ïa ka Unified Command ka ban don u khlieh u ban pynthikna ïa ka jingïatreikam lang.
Ka Sorkar ka don jingthmu ruh ban pynïar ïa ka jingtreikam jong ka ICCC shabar jong ka Shillong.