Nongpoh, Jylliew 30: Ka St. Joseph Academy of Nursing, Umtrew, Ri Bhoi District, mynta ka sngi ka la pynlong ïa ka Convocation kaba ar ha kaba la pynkup burom ïa 45 ngut ki samla pule kiba la pyndep ïa ka General Nursing and Midwifery (GNM) Course na ka bynta u snem 2022-2025.
Ïa kane ka prokram la pynlong ha CFI Centre, Nonglum, Ri Bhoi District, ha ka jingdonlang ki kmie ki kpa, ki nonghikai bad kiwei ki riew rangbah kiba la wan ban sakhi ïa kane ka sngi kaba kyrpang jong kitei ki samla.
U MP ka Rajya Sabha, u James PK Sangma, u la long kum u kongsan, katba u Bah H.M. Shangpliang, Advisor ka tnad pule puthi jong ka sorkar Meghalaya, u la long kum u symbud kongsan. La donlang ruh u Bah A.L. Hek, Advisor bad Director ka St. Joseph Academy of Nursing, ka Kong Lucky Warbah, Principal ka Dr. H. Gordon Roberts College of Nursing, bad ka Kong Ibanrilin Ranee, Principal ka St. Joseph Academy of Nursing.
Kum shi bynta ka jingjop jong kitei ki samla, la sam ïa ki memento bad ki syrnot sha baroh 45 ngut ki samla kiba la pyndep ïa ka jinghikai bad kiba la pynkhreh ban leit shakri pat ha ki hospital bad ki jaka sumar bapher bapher. Ha katei ka sngi la sam ruh ïaki khusnam shimet bapher bapher kum ka jingai mynsiem bad pynshlur ïakitei ki samla.
Haba ai jingkren ha kane ka jingïalang, u James P.K. Sangma u la ong ba ka sngi ka dei kaba dap da ka jingkmen bad ka jingsarong, namar ka long ka jingïoh nong jong ka jingtrei shitom, ka jingïaishah bad ka jingminot jong ki samla ha ki lai snem ba la leit noh.
U la ong ruh ba wat hadien ka jingpyndep ïa ka jingpule bun ki samla kin sdang ban pyrkhat ïa ka lawei bad ka jingïoh kam jingïoh jam, hynrei ka kam nurse kam dei tang ka kam hynrei ka dei ruh ka jingshakri ïa ka imlang ka sahlang.
U la kyntu ïa ki samla ba kin pyndonkam hok ïa ka jingnang jingstad kaba ki la ïoh, bad ban shakri da ka jingkitkhlieh ïa ki nongpang. U la ong ba nalor ka jingsumar da ki dawai, ka ktien kaba jemnud, ka khmat kaba phuh samrkhie ki long ruh ki bynta kiba donkam ban pynkoit ïa ki nongpang.
“Ki briew kiba ym pat ju tip ïa phi kin aiti ïa la ka jingim ha phi, kumta, to long ki nurse kiba don ïa ka jingkitkhlieh, ka jingïaineh bad ka jingïeid ïa ka kam,” la ong u James P.K. Sangma.
