SHILLONG, Jylliew 29: Ka Lamlynti FC ka la ïoh mad ïa ka jingjop da kaba pynliem 3-1 kol ïa ka Mawlynrei SC ha ka jingïalehkai jong ka Group A ha ka lympung 3rd Division Football League 2026 ba la pynïaid da ka Shillong Sports Association hynne ka sngi Nyngkong.
Ha ka jingïalehkai ka Mawlynrei ka la ïoh ba kan lamkhmat nyngkong lyngba u Dawan Mawlong (50’) hynrei ka Lamlynti ka la jubab tang hapoh 2 minit da kaba pynïakhaid lyngba u Chandy Suting (52’). Nangta u Monish Mani (65’) bad u Arban Sohshang (73’) ki la bynrap sa ar tylli ban pynskhem ïa ka jingjop.
Shuwa kane, ka jingïalehkai hapdeng ka Umiew Maw U Sam bad ka Nongumlong SC ka la kut ha ka jingïakhaid, ha kaba baroh arliang kim shym la ïoh ban thep kol.
Ki jingïalehkai SSA 3rd Division 2026 ha kane ka sngi Ba-ar. Por 1 baje mynsngi ka Kharang SC pyrshah ïa ka Lawmali Pyllun SC, ha ka por 4 baje janmiet ka Lummawbah SC pyrshah ïa ka Umphyrnai SC. Baroh ar kin long ha madan First Ground-SSA Stadium.
