Ha ka ‘Maan ki Baat’ kren u Narendra Modi halor ka Jingkieng Jri ba don ha Meghalaya, ai khublei u Conrad

Shillong, Jylliew 28 : U Myntri Rangbah ka Meghalaya, Conrad K. Sangma, u la ai khublei ïa u Myntri Rangbahduh ka Ri, Narendra Modi, halor ka jingkren jong u shaphang ki Jingkieng Jri jong ka Meghalaya ha ka prokram radio “Mann Ki Baat”, kaba la pyllait hynne ka sngi da kaba ong ba kane ka jingithuh ka long ka jingburom ïa ki paid Khasi bad Jaintia kiba la sumar bad pynneh ïa kane ka pateng kolshor kaba la neh da ki phew snem.
Ha ka jingthoh jong u ha ka rynsan X ha ka Sngi U Blei, u Conrad u la pynpaw ba u sngewnguh shisha ïa u Myntri Rangbahduh ba u la pynpaw pyrthei ïa ki Jingkieng Jri kiba don ha ka jylla lyngba ka jingkren paidbah jong u.
U Myntri Rangbah u la ong ba kine ki jingkieng jri ki long “ka jingïoh pateng na kawei ka pateng sha kawei pat”, bad ba la pynheh pynsan bad sumar ïa ki da ka jingïaishah bad jingïatrei shitom jong ki paid Khasi bad Jaintia da ki phew snem.
“Ka jingkren jong phi ka pyni ïa ka jingburom ïa ka jingaiti lut jong ki nongshong shnong jong ngi ban don ka jingïadei kaba jan bha bad ka mariang,” thoh u Conrad ha ka rynsan social media.
U Myntri Rangbah u la pyntip ruh ba ka Sorkar Meghalaya ka dang trei shitom ban pynrung ïa ki Jingkieng Jri ha ka thup jong ka UNESCO World Heritage Site.
“Katba ngi dang pynïaid shakhmat ïa kane ka jingthmu sha ka UNESCO, ka Meghalaya baroh kawei ka sngew sarong halor kane,” la ong u Conrad.
Ki Jingkieng Jri, kiba la shna bad pynwandur da kaba pynïaid ïa ki thied jong u dieng jri ban jam ïa ki wah, ki don bun eh ha ki thaiñ ba shathie jong ka jylla Meghalaya. La ñiew ïa kine kum ka nuksa kaba bha tam jong ka jingpyndonkam ïa ka bor ka mariang bad ka jingtreilang jong ka shnong ka thaw (bioengineering), bad ki long ruh ka bynta kaba kongsan jong ka jingtyrwa jong ka Meghalaya ban ïoh ka jingithuh kum ka UNESCO World Heritage Site.