Ha ki khyndiat sngi ba ladep, ka seng BJP ha ka jylla, ki la kren kob sob sha ki kotkhubor, ba ki don haduh 8 ngut ki kyrtong, kiba kwah ban ïakhun ïa ka elekshon MP 2026 na Shillong Lok Sabha Constituency, hynrei ki la bteng shuh ban ong, ba ki dang bishar ïa kitei ki kyrteng, ha shwa ban sei madan.
Na kaei pat kaba ïohi, na ka jingwan poi Shillong, ki heh jong ka seng BJP, naduh ka myntri pla pisa, kaba la sdang wan khah khah, nangta sa u Rajnath Singh, myntri ïada ri bad sa shibun kiwei de ki heh jong ka seng BJP & RSS, kiba ia kiew ïa hiar khah khah, kumta ki dak ki shin ki kdew, kumba ka seng BJP hi kam kwah ban ïakhun dalade hi bad imat, kumba ka jingïakren sop sop, ka dang ïaid bad ki heh duh jong ka seng NPP, na ka bynta uwei u kyrtong monlang jong ki ar seng, ha kane ka kynti kaba mynta.
Lada katei ka hamsaïa kan leit urlong shisha, kumta kane ka elekshon 2026 ruh, kan long hi thik kum ha u snem 2024, ha kaba ka BJP ka kyrshan ïa ka kyrtong jong ka seng NPP, ka kong Ampareen Lyngdoh.
Ka BJP, ka donkam jingkheiñ kaba heh ha kane ka kynti, namar ba ka don jingthmu ban pyntreikam ïa ka bhah jong ki kynthei bad ban pynheh ia ki Constituency ruh bad lada ka NPP ne ka BJP, ki duh ïa ka Shillong Lok Sabha Constituency, kumta kin duna ïa uwei u dkhot, hynrei lada kin kynran dien noh shiliang shiliang, kumta kin ïa ther tyngeh bad kin ïakhun ban rah ïa ka thong ha kane ka kynti kaba mynta.
Ka elekshon, kan lah ban long sa hadien lai bnai, namar ba ki heh sorkar jylla lem bad ka elekshon komishon, kin dang ïa peit bin pa bin ïa ka jingpynbeit kyrteng thymmai lane ka SIR bad ha kine ki lai bnai ban sa wan, lada ki ïa beit jingmut ki ar tylli ki seng heh jong ka sorkar MDA, kumta ka jingïakhun kan long kaba tdem bha hi thuit bad kan nym long kaba suk ruh ïa ka seng, kaba don bat mynta ïa ka Shillong Lok Sabha Constituency, ba kan pyndem ïa u kyrtong synrop jong kitei ki ar tylli ki liang synshar.
Sharum shaneng la sngewthuh ba ka seng BJP kan hap ban ïakhun tyngeh na ka bynta ban ioh ka jingkyrshan jong ki paidbah ki Khasi Jaiñtia hynrei lada ka shu kob ne ïatai kan ym poi shano shano ruh.
La ïohi ba kiba bun ki heh Sorkar ki la wan sha kane ka jylla ban ïoh khring vote hynrei kane kan ym poi shaei shaei ruh lada ki paidbah kim pat mon.
Lah ban ong ba ha kine ki sngi ka la don ka jingkhih bha jong ki seng saiñ pyrthei ha kaba ïadei bad ki jingbuh ïa ki kyrtong na ka bynta jong ka elekshon shiteng samoi jong ka MP sha ka elekhon Lok Sabha, hynrei la ïohi ba kane ka jingïakhun kan long kaba eh shisha ha kane ka kynti kaba mynta.
Haba ïaid sharum shaneng la shem ba bun na ki briew ki la pynpaw ïa ka jingartatien ha kane ka kynti kaba mynta hynrei ki la pynpaw pat ba ki donkam ïa ka jingkylla kaba long na ka bynta jong ki pateng ban wan bad kumjuh ruh na ka bynta jong ki samla jong ka jaitbynriew.
Lah ban ong ba ha kane ka kynti kaba mynta na ka liang jong ki seng saiñ pyrthei bapher bapher kin ïakhun dohïap bad ban ther beit ha ki rukom bapher bapher tang ban ïoh ka jingjop ha kane ka elekshon kaban ban wan.
La khmih lynti ba kin don bun ki ban ai ki jingïatreilang ha kane ka kynti wat la ka long kaba eh ban ïakhun ïa kane ka elekshon sha Lok Sabha.
Shuh shuh na ka liang jong ki seng saiñ pyrthei ki la pynpaw ïa ka jingdon ka mon ban ïakhun ïa kane ka elekshon hynrei kan long pat ka mat kaba eh naba kin hap ban ïakhun ïa ki seng kiba khlaiñ, hynrei kane ka shong pat ha ki paidbah ban leh ïa kaba donkam.
