Kumba 75% ki nongshong shnong ka jylla kim don khyndew ban shna ïing: President VPP

Shillong, Jylliew 26: U MLA ka Nongkrem u Bah Ardent Miller Basaiawmoit ha ka sngi Thohdieng u la ong ba ka jingmynjur ïa ka jong ka Khasi Hills Autonomous District (Regulation and Administration of Land) (Amendment) Bill, 2026, kadei kum ka jingpyrshang ban ïada ïa ka khyndew ka shyiap kaba lah ban die da ki Raid (Community) Lands bad kum juh ruh ka jingïaleh ban pynsangeh ïa kane ka jingdie ïa ki jaka puta.
Ha kaba ïadei bad kane na ka liang jong u, u la ther ruh ïa kito kiba pyrshah ïa ka jingwan rah ïa ka jingpynkylla ne ka Amendment Bill, kiba ong ba kane kan kdiah ïa ki jingleh jong ki mynbarim ban sloit noh ïa ka iktiar jong ki Dorbar Shnong.
Shuh shuh na ka liang u Bah Basaiawmoit uba dei ruh u President jong ka Voice of the People Party (VPP) u la ong ba kane ka jingthmu ka long ruh ban wanrah ka jingkylla, ban wanrah ïa ka jingtehlakam ïa ka kam bam pisa bad kumjuh ruh ban wanrah ïa ka jingkhuid jingsuba ha ka rukom treikam kaba long na ka bynta ka jingmyntoi jong ki paidbah.
Na ka liang jong u, u la ong ba ka jingmynjur ïa kane ka bill kan pynsangeh ïa kito ki khlieh nongsynshar ban die ïa ki jaka puta bad kiba ïalam bakla ïa ki paidbah ha kaba ïadei bad kane ka kam.
U la bynrap da kaba ong, “Ngi kum ka party ngi ïeng skhem bad kaei kaba ngi leh kan dei beit na ka bynta ka bha ka miat jong ki paidbah trai ri trai muluk.” Shuh shuh u Bah Ardent u la ong ba ka party ka kwah ban ai biang ka bor sha ki paidbah bad kane kan long ruh katkum ka riti synshar jong ki paidbah bad kaba ïaid katkum ki riti dustur jong ki nongshong shnong kane ka jylla.
Utei u Nongïalam ka VPP u la ong ba hapoh ka riti synshar jong ki paidbah, ka bor ka shong beit ha ki paidbah.
Na ka liang jong u, u la ong ba da ka jingwanrah ïa kane ka Amendment Bill la pyrshang ban ai biang ka bor ha ki paidbah.
U Bah Ardent u la ong ba ka Khasi Hills Autonomous District (Regulation and Administration of Land) (Amendment) Bill, 2026, ka long ban pynkhlaiñ bad ai bor ïa ki Dorbar Shnong, hynrei kan dei ban don pat ka jingkhuid jingsuba ha ki rukom treikam jong ki.
Na ka liang jong u, ula ong ba kiba pyrshah ki kynnoh ba ka Executive Committee (EC) ha KHADC ba la ïalam da ka VPP ka pyrshang ban ktah ïa ka bor jong ki Dorbar Shnong.
U la ong, “Ngi khlem pynkheiñ ïa ki bor jong ki Dorbar Shnong, hynrei ngi pyrshah ïa ki khlieh nongsynshar kiba ïalam sha ka jingma jong ki pateng ban wan.”
U Nongïalam ka VPP u la ong ba la ïohi ba da ki spah acre ki jaka jong ki Raid (Community) bad ki jaka ki Hima ki la shah die bad don ruh ka por ba ki paidbah kim don jingtip ïa kane.
“Ki paidbah ki dei ban tip ïa ka jingïadie jaka puta bad ïa kane ym lah satia ban leh tang marwei,” bynrap u Bah Basaiawmoit.
Na ka liang u nongïalam u la ai ka nuksa kum ka Raid Marwet hapoh ka Mylliemship, bad ka Raid Tynring, Mawpdang ha kaba na ka liang jong ka seng ka la shim khia kaba long ka pateng jong ki lawei ki khun samla bad ka jingshngaiñ jong ka jylla.
Katkum ka jingong jong u ka jingdon jong ki jaka kum ka khyndew Raid ka ai ka jingsngaiñ ïa kiba duk ba kyrduh naba ki don ki briew ki bym lah ban shna ïa la ki jong ki ïing khlem ki jaka puta.
U Bah Basaiawmoit u la kdew ba katkum ka khana samari jong u snem 2011, ha Meghalaya ki don kumba 76 percent ki nongshong shnong ki bym don ki jaka puta wat la ki don ki Raid, ne ki jaka jong ki Hima, kumta ka seng ka ïeng na ka bynta ban ïada ïa ki.