Halor ka SIR wan jurip u Election Commissioner ka India sha Meghalaya, leit jngoh ïa ki Polling Station

Shillong, Jylliew 25: U Election Commissioner ka Ri India, Dr. Vivek Joshi, ha ka 23 tarik bad 24tarik mynta u bnai u la don ha Meghalaya na ka bynta ban bishar bniah ïa ka jingpynkhreh jong ka jylla na ka bynta ka Special Intensive Revision (SIR) jong ki electoral roll, da kaba pynlong ïa ki jingïalang bishar kam ha ki distrik bad jurip ruh ïa ki polling station bad ki jingtei kiba ïadei na ka bynta ka elekshon ha Meghalaya.
Ha ka jingleit jong u sha Ri Bhoi District ha ka 23 tarik Jylliew, u Dr Joshi u la ïakynduh ïa u District Election Officer (DEO), ki Electoral Registration Officer (ERO), Assistant Electoral Registration Officer (AERO) bad kiwei pat ki ophisar ba ïadei bad ka elekshon.
Ka jingïalang bishar kam ka la pynleit jingmut khamtam halor ka rukom pyntreikam ïa ka SIR, da kaba peit bniah ïa ki prokram ai jinghikai bad jingpynkhreh na ka bynta ki Booth Level Officer (BLO), ERO bad AERO ban pynthikna ïa ka jingtreikam kaba beit bad kaba seisoh.
Ha ka 24 tarik Jylliew, u Election Commissioner u la bteng ïa ka jingbishar kam jong u ha East Khasi Hills, ha kaba u la don ïa ka jingïalang bad u District Election Officer, ki ERO, AERO bad ki nongtrei ha madan (field staff) ban peit ïa ka jingïaid shaphrang bad ka jingpynkhreh jong ka SIR ha ka distrik.
Kum shi bynta jong ka jingleit jurip, u Dr. Joshi u la leit peit ïa ka Polling Station ha Sacred Heart Boys’ Primary School, Mawlai, kaba hap hapoh ka Mawlai Assembly Constituency, bad ruh ïa ka Pine Mount Polling Station, kaba hap hapoh ka East Shillong Assembly Constituency.
Ha kine ki jaka, u la jurip ïa ki jingtei bad ïakren bad ki ophisar kiba don ha ka jaka shaphang ki jingshakri sha ki nongthep vote, ki kam ba ïadei bad ka electoral roll, bad ki jingpynkhreh ban pyntreikam hok ïa ka prokram SIR bad kiwei kiwei.
Kane ka jingleit jurip ka la kynthup ruh ïa ka prokram thung dieng ha ki phyllaw jong ki polling station, kaba long shi bynta jong ka jingpyrshang ban kyntiew ïa ka jingïada mariang.
Hadien kane, u Dr. Joshi u la ïakynduh ruh ïa ki khynnah samla kiban sa long ki nongthep vote ha ki snem ban wan ha kaba u la kyntu ïa ki ban shim bynta ha ka synshar paidbah ynda ki la kot sha ka rta kaba bit ban pynrung kyrteng kum ki nongthep vote.
U la ban jur ba ka jingïashim bynta ha ka elekshon bad ka jingkitkhlieh kum ki nongshong shnong ka long kaba kongsan bha ban pynkhlaiñ ïa ka synshar paidbah ha ka ri.