Ka jingdon kiba die madan ka long ka jingshngaiñ, jingitynnad ka Shillong: Kong B Mukhim

Shillong, Jylliew 25: Ka seng Meghalaya and Greater Shillong Progressive Hawkers and Street Vendors Association (MGSPHSVA) ha ka sngi Palei ka la rakhe ïa ka jingdap snem Sngi kha kaba 10 snem naduh ba la seng ïa ka ha ka snem 2016.
Ha kane ka sngi la sakhi lang da ka jingïadonlang ka Deputy Commissioner jong ka Food and Safety jong ka tnat Food and Safety ka Kong B Mukhim ha ka jingïadonlang bad ai jingkren jong u K V Rajan bad kiwei kiwei.
Haba kren ha kane ka sngi na ka liang jong ka Kong B Mukhim ka la ong ba ka jingdon jong kiba die madan ka wanrah ka jingshngaiñ bad jingitynnad jong ka Nongbah Shillong.
Ka la ong ba kum ka seng la hap mad ïa kiba bun ki jingeh hynrei donkam ka jingïatreilang. “Na ka liang jong ka tnat ka ai jingkyrshan ia kiba bun ki dawbah jong ka seng hynrei ha kajuh ka por pat hap ban ai da ki dieng sympat haba ki ïaid lait ne ki pynkheiñ ïa ki kyndon, kumta ha kiba bun ki liang bun na ki nongkitkam jong ka seng ha ka por ba ki ïakynduh ïa nga, nga la ju ong ba kin long kiba peitngor bha khamtam ha kaba ïadei bad ki kam kiba ïadei bad ka jingdie ïa ki marbam ne kiwei kiwei pat.”
Ka la ong ruh ba bun na ki longïing jong kiba die madan kin hap ban kyrshan phah skul ïa la ki khun, kumta donkam ia ki ruh ba kin wan sha ophis ne ban wad ia ki lad jingtip ha kaba iadei bad ki skhim kiba iadei bad kiba die madan kiba la ai da ka sorkar pdeng bad kiwei kiwei ki lad.Katba ka Kong Anjela Rngad ka la ai khublei ïa ka seng kiba die madan ha kane ka jingkynjoh kaba shi phew snem naduh ba la seng, da kaba pynpaw ruh ba kin don ki jingeh hynrei donkam ka jingïatreilang bad ki dang don ki kam kiba hap ban ïatreilang nangne shakhmat.
Ha kane ka sngi la ïoh ïa ka jingkren na ka kong Lasara Marbaniang President bad kiwei kiwei ki dkhot jong ka seng.Ha kane ka sngi ka la don ruh ka jingpynlait ïa ka kaiphod treikam jong ka seng, ki jingïaleh kai bapher bapher bapher la pynkhreh da seng nalor kiwei kiwei pat ki prokram. Kane ka iew lah ban ong ba ka la sdang naduh ka sngi Palei bad ban kut pat haduh ka sngi saitjaiñ jong mynta u taïew.
Wat tang ha ka sngi kaba nyngkong la ïohi ïa ka jingwan jong kiba bun ki briew ban thied ïa ki tiar ki tar bad kumjuh ruh ka jingïashim bynta jong kiba bun ki briew ha kane ka sngi.
Na ka liang jong ka seng ka la kyrpad ruh ïa ki paidbah ba kin wan ban thied ïa ki tiar ki tar na kane ka jaka ha All Saints Hall kaba ha IGP Shillong ha kaba ka la ong ba da ka jingwan ban shim bynta jong ki kan long kum ka lad ka lynti ban ïarap thied lem ïa ki tiar ba ki la die ha kine ki sngi kata naduh ka 25 tarik haduh ka 27 tarik mynta u bnai.