Ïoh ka MLCU ïa ka kyrdan ba 1 ha Meghalaya ba 2 ha NE bad ba 60 hapoh ka ri India

SHILLONG, Jylliew 24: Ka Martin Luther Christian University (MLCU) ka la ïoh ïa ka kyrdan ba ha khlieh duh napdeng ki skulbah shimet ha Meghalaya ha ka IIRF India Ranking 2026, ha kaba ka la ïoh ruh ïa ka kyrdan kaba 2 ha kylleng ka Northeast India bad ha ka kyrdan kaba 60 ha ka ri baroh kawei.
Katkum ka kyrwoh khubor na u Bah Synranlang Kharlyngdoh uba dei u PRO jong ka MLCU u la ong ka jingpynbeit kyrdan da ka International Institutional Ranking Framework recognises institutions halor ka jingtbit ha ka jingpule (academics), ka jingwad bniah (research), ki jingpynrung kam (placement) bad ka jingtreikam jong ki jaka pule baroh kawei.
Ka jinglah jong ka jingtrei kam bha jong ka MLCU ka la buh ïa ka ha khmat jong kiwei pat ki skulbah shimet ha ka jylla bad napdeng ki skulbah ba pawnam ha ka thaiñ Shatei Lam Mihngi.
Kane ka skulbah ka la wan ha khmat eh ruh hapoh ka jylla Meghalaya ha ka Education World India Higher Education Rankings 2026 kaba dang shen.
Ka Education World ka dei kawei na ki jingpeit bniah ba la burom jong ka India shaphang ka jingpule kaba kham shalor, kaba bishar bniah ïa ki skulbah halor ka nam ha ka jingpule, ka jingbha jong ki nonghikai, ka rukom hikai bad ki jingtei, ka jingkyrshan ïa ki samla pule, ka jingwad bniah, bad ki jingmih na ka jinglah ban ïoh kam.
Da kaba khot ïa kane ka jingithuh kum ka jingpynpaw ïa ka jingaiti jong ka MLCU ha ka jinghikai kaba pynkylla bad ka jingpynwandur thymmai, ka skulbah ka la ong ba ïa kane ka jingjop la pynlong da ki samla pule, ki nonghikai, ki nongtrei, ki samla pule barim, bad ki paralok.
Kum ka jaka pule kaba pawnam ha ka thain shatei lam mihngi, ka MLCU ka la ong ba ka dang pynleit jingmut ha kaba ai ïa ka jinghikai kaba bha bad ban pynroi ïa ki samla pule kiba la pynkhreh na ka bynta ka lawei kiba noh synniang kaba don jingmut sha ka imlang sahlang.