Nongstoiñ, Jylliew 24: Ka District Magistrate Eastern West Khasi Hills, Mairang lyngba ka kyndon Aiñ 163 BNSS 2023, ka la pynmih ïa ka hukum ban khang pyrshah ïa ki briew kiba pyndonkam beaiñ ne kyntur pud ïa ki rud jong u surok bah Shillong-Nongstoiñ-Tura NH 44E kiba hapoh jong ka Eastern West Khasi Hills District.
La pynmih ïa kane ka hukum, hadien ki jingujor ba la ïohlum ha kaba ïadei ba ka jingdon ki ba pyndonkam beaiñ ne kyntur pud ha ki rud jong u surok bah Shillong-Nongstoiñ-Tura Road NH-44-E.
Na liang jong ka tnad PWD ka la shim ïa ki lad ki lynti ban nym shah ïano ïano ban kyntur pud ne pyndonkam beaiñ ïa ki bynta jong ka surok, kaba lah ban buh jingeh ïa ka jingshngaiñ jong ki paidbah, kan pynthud bad pynkhapngiah ïa ka jingïaid ki kali bad ruh ka khanglad na ka bynta kiwei ki kam pynroi kum ka jingpynheh surok.
Ha kaba ïadei bad kane ka jingpynmih hukum, lada don kino kino ki bym sngew ïahap ne sngew pyrshah ki lah ban leit ïakynduh ïa ki bor ba dei khmih.
