Nongpoh, Jylliew 24: Ka Federation of Khasi Jaintia and Garo People (FKJGP) Bhoirymbong Circle hapoh ka jingïalam u Bah Boy Kurbah kum u President bad u Bah Banseng Sohiong kum u General Secretary, mynta ka sngi ka la leit ban ïakynduh ïa ki ophisar jong ka MeECL ha Umiam halor ka jingthud bad jingbymbiang ka bording elektrik kaba la ktah jur ïa ki paidbah ka thaiñ Bhoirymbong.
Haba kren sha ki lad pathai khubor hadien ka jingïakynduh, u Bah Banseng Sohiong, General Secretary ka FKJGP Bhoirymbong Circle, u la ong ba ka seng ka dap da ka jingsngewkhia halor ka jingthud khah khah jong ka bording elektrik ha katei ka thaiñ, kaba la wanrah jingeh ïa ki paidbah ha ka jingim ba man ka sngi.
U la ong ba bun ki nongshong shnong ki la pynsngew sha ka seng ïa ka jingsngewdiaw bad ka jingeh ba ki ïakynduh namar ka jinglip bad jingthud jong ka bording. Kumta, ka seng kam banse ban leit ban pynpaw ïa kine ki jingeh hakhmat ki ophisar jong ka tnad sam bording bad daw aba ka bording ka dei ban long kaba thikna ha katei ka thaiñ.
Shuh shuh, ka seng ka la dawa ruh ïa ka MeECL ba kan thung noh mardor kumba ar ngut ki lineman ban peit bad sumar ïa ki bynta jong ka thaiñ Bhoirymbong, khnang ba kino kino ki jingthut ha ka bording kin lah ban pynbeit kloi bad ban pynthikna ïa ka jingsam bording kaba kham bha sha ki paidbah.
Na ka liang ka FKJGP, la ai por ruh haduh shi bnai ïa ka tnad ba dei khmih ban shim ïa ki sienjam kiba donkam na ka bynta ban pynbeit ïa ka jingeh bording bad ban pyndep ïa ka jingdawa ban thung ïa ki lineman ha katei ka thaiñ.
Ka seng ka la pynpaw ba lada ym don ka jingpynbeit hapoh ka por ba la buh, kan sa pyrkhat ban shim da kiwei pat ki sienjam ban pynbor ïa ka tnad ba kan sngap ïa ka sur bad ka jingeh jong ki paidbah ka thaiñ Bhoirymbong.
