U Kwai, Duma bad Kyiad ki daw tynrai jong ka jingpang bampong ha NE bad ha ka ka Ri baroh kawei

Shillong, Jylliew 23 : U Kwai, Duma bad Kyiad ki dei ki daw tynrai jongka jingpang bampong ha kane ka thaiñ shatei lam mihngi bad ha ka Ri hi baroh kawei, ïathuh u Dr Sourav Datta, Director Manipal Oncology Services and Senior Consultant Head and Neck Oncosurgery haba kren sha ki Nongthoh khubor.
Mynta ka sngi ka dei ka Sngi ba kyrpang ïa ki Nongthoh khubor ha ka nongbah namar ka Manipal Group of Hospitals na Kolkata ka la wan ban ai jinghikai ïa ki Nongthoh khubor ha Shillong Press Club (SPC) halor ka phang kumno ban ïada bad sumar na ka jingpang bampong bad kumjuh ruh na ka jingpang sangeh treikam kynsan u klongsnam.
ïa kane ka jinghikai la pynlong ha ki lai bynta kaba nyngkong ka dei ka jingïamir bad tohkit na ki Nongthoh khubor halor ka jingkoit jingkhiah jongki la ki don kano kano ka jingsngewpher ha ka met ka phad. Lada ki don ki doktor ki la ai jingthoh ba kin leit test bad thied ruh aki dawai dashin. Nalor kata la hikai kumno ban nang ban kiar na ki jingbam ki bym tei ïa ka met ka phad. Kaba ar ka dei ka jinghikai kumno ban ïarap bad sumar kyrkieh ïa kito kiba kem pang bad kyllon kyndit kyndit lehse na ka jingpang klongsnam da kaba pynhikai ïa ki ban leh ïa ka Cardiopulmonary Resuscitation (CPR). Ha kane ka phang la hikai bad batai shai kumno dei ban ïarap kyrkieh ïa kito kiba shu kem pang kyndit ne kyllon kyndit ha ba ïaid ba ïeng ne haba trei ba ktah.
Ha ka bynta ba khatduh pat la ïoh ka jingïaphylliew jingmut bad jingbatai shaphang ka rukom sumar ïa ka jingpang bampong kat kum kane ka juk saian ba mynta da ki kor ki bor Robot kaba la leh mynta ha Manipal Hospital , Kolkata.
U Dr Datta u la ïathuh ba ka Manipal ka dei ka kynhun ba don bun eh ki hospital ha ka ri namar ka don haduh 49 tylli ki hospital ha ka ri baroh kawei. Tang ha Kolkata ki don haduh jin san tylli ki hospital. Ki doktor jong kane ka hospital ki dei kiba la dep pyntbit bad kiba la trei ruh ha ka Cancer Institute Mumbai. Ki don 21 ngut ki doktor kiba na ka Cancer Institute Mumbai ki dei kiba ai jingsumar ïa ka jingpang bampong ha Manipal Hospital Kolkata.
Na ka liang u Dr Datta u kyntu bad ïawer ïa kito kiba ïoh ïa ka jingpang bampong ba kin wan pyrshang ban shah sumar ha Manipal Kolkata namar kine ki dei ki juh ki doktor kiba ju ai jingsumar mynshwa ha Cancer Insitute Mumbai bad mynta ki la don ha Kolkata. U la ong “ Nalor ba ka lynti ïaid ka jan, ka dor ban sumar ruh ka dang kham tad ban ïa kaba leit shah sumar sha Mumbai ne Delhi. Nalor kata u la ong ka bai bam, bai sah bai dem ruh ka dang tad ha Kolkata lada ïanujor sha Delhi bad Mumbai.
Ki don ruh kiwei kiwei ki doktor kiba la ai jingbatai bha halor ka jingsumar ïa ka jingpang bampong kaba dei naduh ka jingpuid na ka bynta ba ïoh ïa ka jingpang, ka jingleh ia ka Chemotherapy, ka Radiation bad ter ter.
Ki doktor kiba la iadon lang ki long Dr Abhay Kumar, HOD Senior Consultant, Arindam Mondal HOD, Senior Consultant Dr Depdeep Samaddar bad Dr Subhandar Chakrabarti Consultant.