Mynta u snem khreh ka sorkar ban pyntreikam ïa ka Polisi ban pynduh noh ïa ki kali ba la rim

Shillong, Jylliew 23: U Symbud Myntri Rangbah ka Jylla uba khmih ïa ka tnad Transport u Ma Sniawbhalang Dhar ha ka sngi Ba ar ula ong ba ka Sorkar Meghalaya ka dang don ha ka lynti ban pynbiang pura noh ïa ka Vehicle Scrappage Policy 2025 da ka jingthmu ban pyntreikam noh hashwa ban kut une u snem.
U Ma Sniawbha ula ong, ba ki jingtip kiba bniah jong kane ka policy, kynthup ïa katno tylli ki kali kiba dei ba shah pynduh noh ha une u snem, yn sa pynbna shisien ba la dep ban pynbit pynbiang ïa katei ka rukom treikam.
“Ngi dang don ha ka lynti ban trei halor kane bad kan dang shim por. Shisien ba ngi lah pyndep ïa kane ka kam ka jam, baroh kiei kiei yn sa pyntip sha phi, katno tylli ki kali bad kiba kumno ki jait kali kiban shah pynduh noh mynta u snem. Kumta mynta u snem ngi dang don ha ka lynti ban pynbiang pura noh” ong u Ma Sniaw.
Ula kubur ba ka jingpynwan dur ne ban pynbit pynbiang ïa kane ka rukom treikam kan dei ka ban dang shim por, hynrei ula pynpaw pat ïa ka jingskhem jingmut ba dei ban pyntreikam naduh u snem 2026.
“Kan dang shim shuh ïa ka por hynrei katkum ka jingsngewthuh ka jong nga, hapoh une u snem ngi lah dep ban pyntreikam noh ïa kane” ula ong.