Shillong, Jylliew 23: U Symbud Myntri Rangbah ba khmih ïa ka tnat Transport u Ma Sniawbhalang Dhar u la pynbna ba palat 15 tylli ki bus thymmai yn sa pynkamai noh naduh ka 3 tarik Naitung, haba kyntu ïa ki tnat ba kin pynthikna ïa ka jingsumar bha ïa ki bus ba la don lypa.
U Ma Sniawbhalang u la ong ba ka Sorkar ka la ju bthah man ka por ïa ki nongpynïaid bad ïa ki nongniah Bus ban maramot bad sumar bha ïa ki kali khnang ba kin ym kylla long ki bym lah pyndonkam shuh tang hadien 1-2 snem.
“Na ka por sha ka por ngi la bthah ïa ki nongpynïaid bad ki nongñiah Bus ba kin maramot bad sumar bha ïa ki Bus, kam dei ban long ba tang hadien 1-2 snem, kine ki Bus kim long shuh ban ïaid, ngi ïai kyrpad ïa kiba peit ïa kine ki Bus” la ong u ma Sniawbhalang.
U Ma Sniawbhalang ula ong ba ula lum ïa ka jingïalang ha u bnai ba la dep ban bishar bniah ïa ka jinglong jingman jong ki Bus khnang ba ki nongleit nongwan kin sngewtynnad ban pyndonkam ïa ki. “Ha u bnai ba la dep nga la khot ïa ka jingïalang ban pynthikna ba kine ki Bus kin long kiba bha bad kiba itynnad khnang ba ki briew kin ïoh mynsiem ban pyndonkam ïa ki,” u la pynpaw.
Ia kine ki bus thymmai yn pyllait paidbah na ISBT bad kin ïaid ha ki lynti kiba bun ha kylleng ka nongbah Shillong.
“Ha ka 3 tarik Naitung ngan pyllait paidbah ïa ki Bos thymmai na ISBT ba kine kin ïaid haki jaka thymmai jong ka nongbah. Ki don palat 15 tylli ki Bus thymmai,” u la ong.
U Symbud Myntri Rangbah u la kdew ba katto katne ki tnad, kynthup ïa ka Planning, Municipal, bad ka MUDA, ki pyndonkam mynta ïa ki Bus Sorkar, bad u la kyrpad ïa ki ban shim ïa ka jingkitkhlieh na ka bynta ban sumar bha bad maramot lada donkam.
“Ïa kine ki bus la pyndonkam da ki tnad bapher bapher kum ka Planning, Municipal, MUDA bad kiwei kiwei de. Ngi kyrpad ïa ki ba kin sumar bha bad maramot ïa kine ki bus nangne shakhmat,” u la bynrap.
