Nongstoiñ, Jylliew 23: Ka khubor hamsaïa ba ka don ka jingïap jong ki sniang ha ka thaiñ Nongstoiñ ka la pur sted bha ha kaba bun ki paidbah nongri sniang ki la syier mynsiem bad sheptieng bha ïoh lehse kumno kumno kan jia bad saphriang ruh sha kiwei ki shnong. Wat la katei ka khubor hamsaïa ka la pur sted bha hynrei haba pyrshang ban wad jingtip na ki bor pynïaid district ym shym pat la ïoh jingtip satia ba ka swine flu kan don ha Nongstoiñ ne ha kiwei pat ki shnong hapoh ka district.
Ha kaba ïadei bad ka jingïap jong ki sniang ka long kaei kaei ka bym lah ban pdiang ban shu ong ba ka dei ka swine flu bad ki nongri sniang ruh ki dei ban tip kumno ban ai bam ïa ki sniang katkum ka aïom bad lada ki sniang ki ïap ki dei ban pyntip ha ki doctor kiba peit ïa ki jingri jingdup ba kin wan ban examin bad ban test ban lap ïa ka daw balei ba ki sniang ki ïap.
Ha kaba ïadei bad ka jingpynphriang jong ki riew shimet ïa kino kino kino ki khubor khlem da pynthikna la ki dei kiba shisha ne kiba la shu antad ka long ka bym lah ban pdiang hynrei ym lah pat ban pynsngewthuh ïa ki nongshong shnong namar ba ka ha nga, ka malade, ka tip lut, ka nanglut bad ka jingñiew beiñ ïa kiwei ka la shong kulai ha man la uwei pa uwei u nongshong shnong. Kaba kham sngewsih ka long ba wat ïa kiba kham halor bad ki nongsynshar kiba im sngi ban wanrah ïa ka bha ka miat ha ka imlang sahlang, ka shongsuk shong saiñ bad ka bha ka miat kim burom ne kheiñ kor shuh ïa ki namar la synshar palat u manga.
