Wat nym leit sha jaka twa khyndew, ka long kaba ma ba lah ban khyllem shuh shuh haba jur slap: BDO Laitkroh

Shillong, Jylliew 22: Na ka daw jong ka jingkhyllem, ka jingtwa khyndew kaba jur kaba wanrah ruh ïa ka jingdkut ne jinghap noh ka bynta jong ka surok Shillong-Dawki ha Umthli kaba la pynlong ïa ka surok ban khang khyrdep syndon. Na ka liang u Bah W.K. Kharbuli, MCS, Block Development Officer, Khatarshnong Laitkroh C & RD Block Laitkroh u la pynmih ki kyndon kiba donkam kyrkieh na ka bynta ki paidbah ba kin hap ban bud.
Katkum ki kyndon ba la pynmih da u BDO la bthah ïa ki paidbah ba kim dei satia ban ïa leit paidbah ne leit shajan ka jaka ba twa ka khyndew namar ka surok bad ki bynta kiba marjan jong ka jaka ba la twa khyndew ki long kiba ma bad ki lah ban khyllem shuh shuh khamtam haba jur slap.
U la bthah ruh ba kam dei ban don ka jingïalum paidbah, ne leit peitkai, lane leit shon dur ne leh kano kano ka kam hajan katei ka jak ba twa khyndew.
La bthah ïa ki kmie ki kpa, bad ki nongïalam shnong ki dei ban long kiba peitngor bha ba ki khynnah, khyllung bad kiwei pat kim dei leit sha katei ka jaka kaba buh jingma.
La pynbna ruh ba ïa ka surok Shillong-Dawki la khang noh shuwa naduh ba pynmih kane ka hukum tad haduh ynda pynbna da kumwei pat na ka Bor Synshar Distrik (District Administration).
La ong ba ki paidbah ki dei ban long kiba husiar ha kum kane ka por ba don ka jingjur slap bad pyntip ruh mardor sha ki nongïalam shnong ne ki ophisar sorkar lada lap ïa kino kino ki dak kiba lah ban wanrah ïa ka jingtwa khyndew bad ruh lada don ka jingmynsaw ne jingduh noh ïa ki mynsiem briew, ki mar-rep ne ki ïng sah briew da kaba phone ha u nombar 112.
La kyrpad ïa baroh ki paidbah ban ai ka jingïatreilang bad ka District Administration, ki Police, ka NHIDCL bad kiwei kiwei ki tnat sorkar ba dei peit khnang ban lah tehlakam na kino kino ki jingjia kiba sngewsih.
Kumjuh ruh sngewbha ban bud ryntih ïa ki jingkdew lynti ban nym ïaid lyngba shuh ïa ka surok Shillong-Dawki hynrei ban shim ïa kine ki lynti Shillong-Sohra-Sohbar-Dawki, Shillong-Jowai-Amlarem-Dawki.
Ïa kane ka jingbthah la pynmih na ka bynta ka jingshngaiñ jong ki paid nongïaid nongïeng, ong ka khubor ba la pynmih na ka ophis u BDO.