Kyrpad u Myntri Rangbah ïa u Rajnath ban pynbha ïa ka surok khappud Ranikor- Ratacherra kum ka surok ba kongsan tam

Shillong, Jylliew 22 : U Myntri Rangbah ka Jylla y Conrad K Sangma ula kyrpad ïa ka Tnad Kam Iada ri ba kan pynbna ïa ka bynta jong ka surok ba jah, kaba ïasoh na Ranikor-Ratacherra kum ka project ba kongsan ha ka Ri (strategic road), haba pynksan ba ka donkam bha na ka bynta ki kam pahara khappud bad ka ïoh ka kot jong ka thaiñ Shatei Lam Mihngi.
Kane ka jingkyrpad ka la mih ha ka jingïakynduh bad u Myntri kam Iada Ri Rajnath Singh ha ka sngi U Blei ha Shillong. U Conrad ula ïathuh ba ula ïakren ïa bun ki jingtyrwa ba ïadei bad ki jingtei bad u Rajnath, khamtam kito kiba ïa takhuh bad ki kam jaka bad ka jingïatreilang bad ki bor shipai ha Shillong.
“Ngi la ïoh ïa ka jingiakren kaba lyngkot bad u Myntri kam Iada Ri”ong u Conrad hadien ka jingïalang. Ula kdew ba ki bor shipai kila don bun bha ha kylleng ka sor Shillong bad ki jaka ba markhap, kaba pynlong ïa ka jingkyrshan jong ki kaba kongsan ha kiba bun ki project kiba dang ïaid.
Ula kdew ia ka project ban pynheh ia ka Shillong Airport ha kaba ula ong “Ngi la ioh ia ka jingkyrshan ba pura na ka Defence Ministry bad ka jingtyrwa surok 4-Lane na Rilbong sha Barik Point, ia kaba “U Myntri kam Iada Ri ula dep ai ka jingkular ba un ai ka jingkyrshan ba pura”.
U Myntri Rangbah ula ong ba ka kam ba u kwah ban leh ka long ïa ka surok Ranikor-Ratacherra kaba don ha khappud ka Bangladesh.
“Kham kongsan eh, mynta ka nga la ïoh iakren ïa ka mat kaba kongsan bha kaba dei ka lad pynïasoh na Ranikor sha Ratacherra” ula ong. Haba batai ïa ka jingkongsan, u Conrad ula pynpaw ba ka Meghalaya ka don ïa u pud u sam ba jrong bha bad ka Bangladesh bad ka jingpynïasoh na Ranikor sha Dali ka dei kaba la pyntrei da ki bynta bynta.
“Na Dalu yn pynïasoh pat sha ka surok NH217, bad pynïasoh shaduh ka 127B bad nangne sha ka Jingkieng Phulbari-Dhubri. Kumta lada phi peit ïa kine kiei kiei baroh, kane ka long ka lad pynïasoh kaba kongsan bha, ka ban ïalam ïa ngi baroh shaduh sha Silchar” ula batai.
U ong, kane ka dei ka bynta kaba jan-ka surok Ratacharee-Ranikor. “Ngi la kyrpad ïa ka Defence Ministry ba ka lah ban pynbna kum ka surok ba kongsan namar kam dei eh tang na ka bynta ki kam jong ka ïoh ka kot lane ban pyndonkam u paidbah hynrei ka dei ka lad pynïasoh kaba donkam ha ka ban pynthikna ia ka jingshngaiñ jong ka Ri” ong u Conrad haba pyntip ba u Rajnath Singh ula ai ïa ka jubab kaba sngewtynnad ïa kane ka jingtyrwa.
“Ula pdiang ïa ka bad ula bthah ïa nga ban wan ïakynduh biang ïa u bad pyntip ba un sa khmih ïa kane ka kam ha ka lynti kaba dei” ong u Myntri Rangbah.
U bynrap ba u Myntri ka Ministry of Road Transport and Highway Nitin Gadkari ruh ula pynpaw kham hashuwa ba ka Defence Ministry kan shim ïa ka bynta kaba kongsan, ta ka daw ula rah ïakren ïa kane ka mat beit beit bad u Rajnath Singh.