ïakren u Myntri Rangbah halor ki surok khappud bad jingpynheh ïa ka kad liengsuiñ Shillong

Shillong, Jylliew 21: U Myntri ka tnad Ïada ri u Rajnath Singh ula ïashim bynta lang bad ki shipai bad ki ophisar ka jylla ha ka ban rakhe ïa ka International Yoga Day ha Eastern Air Command ha Shillong hynne ka Sngi U Blei, ha kaba ula ïashim bynta lang ha ka prokram leh Yoga.
Haba ïakren bad ki nongthoh khubor, u Myntri Rangbah ka Jylla u Conrad K. Sangma ula ai khublei ïa u Myntri Rangbah duh ka ri u Narendra Modi uba la lam khmat ïa ka jingrakhe ïa ka International Yoga Day bad pynpaw ruh ïa ka jingsngewnguh ïa u Myntri ka tnad Ïada ri uba la wan ban ïashim bynta ha kane ka prokram ha Shillong.
U Myntri Rangbah ula pynpaw ïa ka jingmyntoi na ka jingleh Yoga bad ong, ba kane ka rukom leh ka dei kaba ïarap bha ïa ka jinglong jingman, ka jingsting bad ka jingbha ha ka met ka phad baroh kawei. Ula pynshlur ïa ki paidbah khamtam ïa ki samla ban pynlong ïa ka jingleh ïa ka yoga kum shi bynta ha ka jingim kaba man la ka sngi ka jongki.
Hadien kane ka jingleh yoga, u Myntri Rangbah ka Jylla bad u Myntri Ïada ri ki la ïakren halor kiba bun ki mat jong ki jingtei kiba kongsan ha ka jylla kiba donkam ïa ka jingïatreilang bad ki bor shipai ryngkat ka Ministry of Defence.
Ki katto katne ki mat kiba kongsan kiba pynsngew ki kynthup ïa ka jingpynïar ïa ka Shillong Airport bad ïa ka Four-Lane Road Project ka pynïasoh ia ka nongbah Shillong haduh Barik Point. U Conrad Sangma ula ong, ba ka Ministry of Defence ka la ai ïa ka jingkyrshan na ka bynta kitei ki ar tylli ki sienjam.
Ka mat kaba kongsan bha jong ka jingïakren ka dei ka jingtyrwa ïa ka surok kaba pynïasoh hapdeng ka Ranikor bad Ratacherra ha shi lynter ka khappud jongka India-Bangladesh. U Myntri Rangbah ula kyntu ïa u Myntri Ïada ri ban pynbna ïa katei ka bynta kum ka ‘Strategic Road’ da kaba kdew ba kane ka long kaba kongsam tam na ka bynta ka jingshngaiñ jong ka ri bad ïa ka roi ka par jong ka thaiñ.
U Sangma ula ong ba ka jingpynïasoh na Ranikor sha Dalu ka dei kaba lah dep pynwan ha ki wat bapher, da kaba pynïasoh ïa ka surok sha ka NH-217 bad NH-127B bad nangne da kaba ïaid lyngba ka Phulbari-Dhubri Bridge Corridor shaduh Silchar. Hynrei ka bynta jongka Ratacherra-Ranikor ka dei kaba ym shym la don satia kano kano ka jingkyntiew.
Ula ban jur ba da ka jingshna pyndep ïa ki jingpynïasoh kiba la leh klet kan pynkhlaiñ shuh shuh ïa ka lad pynïasoh ha khappud, pynsuk ïa ka leit ka wan ki paidbah bad ka jingkit ïa ki mar ki mata bad kan long ruh kum ka jingshakri na ka bynta ka bha ka miat jong ka jingai jingïada bad jingshngaiñ ia ka thaiñ.
Katkum ka jingong u Myntri Rangbah, ula ïathuh ba u Rajnath Singh ula pynpaw ïa ka jingsngewtynnad halor kane ka jingtyrwa bad ula pynthikna ba ïa kane ka mat kan dei ka ban sa ïoh ïa ka jingai jingmynjur.
U Sangma ula pynpaw ba ïa kane ka mat, kham hashwa ula dep ban ïakren bad u Myntri ka Sorkar Pdeng uba khmih ia ka Ministry of Road Transport and Highways u Nitin Gadkari, uba la ban jur ïa ka jingkongsan ban ïoh ïa ka jingkyrshan na ka Defence Ministry na ka bynta kane ka projek.
Lada ïoh jingmynjur, kane ka jingtyrwa ïa ka Strategic Road la khmih lynti ba kan kyntiew ïa ki lad pynïasoh ha ki thaiñ khappud ka Meghalaya bad kan long ruh kum ka bynta kaba kongsan ha ka ban ai jingïada ïa ka ri bad ka khyrdop ka ïoh ka kot ïa ka thaiñ shatei lammihngi.