Pynrem ka HYC bym lah ka sorkar bad ki nongmihkhmat ka Shella ban ïada ki jingpynjulor ka mariang

Shillong, Jylliew 21: Ka Hynñiewtrep Youths’ Council (HYC), Shella Area Unit, ka pynrem jur ïa ka jingbym lah jong ka Sorkar Meghalaya bad u nongmihkhmat ka Shella Constituency ban wad ïa ki lad jingïada kiba paka bad kiba neh ban ïada na ka jingjulor kaba ju jia man la u snem namar ka jingshlei um bad ka jingkhyllem ka Khyndew ha ki bynta jong ka Shnong Shella.
Man la ka aïom slap, bun bah ki jaka rep, ki jingthung jingtep bad ki ïing briew kiba don ha rud ka Wah Umïam ne Bakra Shella, kumba tip paidbah, ki shah rong noh ha ka um. Watla kane ka jingeh ka la bteng la bun phew snem, hynrei haduh mynta ym pat shym la don kino kino ki sienjam kiba biang bad kiba neh ban ïada ne pynkut ïa kane ka jingeh jong ki Nongshong shnong, kynthoh ka HYC Shella Unit.
Ka la ong ba ka long kaba pynsngewsih bha ba katba ka Sorkar ka ju kren shaphang ka roi ka par bad ka pynlut da ki klur tyngka ha ki projek bapher bapher, hynrei ka leh klet pat ban ïada ïa ki jingdon jingem jong ki nongshong shnong bad ïa ka khyndew ka jong ki khamtam ha ki nongkyndong kiba jngai bad pajih na Sor. Ka long ruh kaba sngewsih ba u nongmihkhmat ba la jied na Shella Constituency u sngap jar bad um shym la lah ban wanrah ïa kino kino ki jingïada kiba neh na ka bynta ki nongrep bad ki trai khyndew kiba shah ktah.
Ki paidbah bad ki trai jaka jong ka Shnong Shella ki la ngiah ïa ki jingïakular ba suda bad ki jingïarap shipor hadien man ka jingjia. Ki don ki khep ba kim ïoh ïa ki sienjam kiba paka kum ki jingtei ban ïada ïa ki rud wah, ki projek ban tehlakam ïa ka jingkhyllem khyndew bad ki lad jingïada kiba pura ki ban tehlakam ïa ka jingktah na ka jingshlei um.
Namarkata, ka HYC Shella Area Unit ka dawa ïa ka jingtuklar ba mardor jong ka Sorkar Jylla, kaba kynthup ïa ka jingjurip bniah ïa ki jaka ba shah ktah, ka jingmynjur ïa ki projek jingïada kiba neh ban tehlakam ïa ka jingkhyllem khyndew, ka jingïarap pisa sha ki longïing, ki trai khyndew kiba shah ktah bad ka jingbuh ïa ka por kaba thikna ban pyntreikam ïa ki lad jingïada khnang ban lait na ka jingduhnong shuh shuh ïa ka khyndew bad ki jingdon jingem.
Ka jingbym suidñiew ïa kane ka mat ka long kaba ym lah ban pdiang shuh. Ki paidbah ka Shella ki dei hok ban ïoh jingïada, ym tang ki jingkular; ki kwah ban ïohi ïa ka kam, ym ïa ki nia suda, ong u Samla Bantyngshain Natep Vice-President, HYC – Shella Area Unit.