Banjur u Conrad ïa ka jingïatreilang jong ki jylla halor ki kam jngohkai pyrthei

Shillong, Jylliew 20 : Ka seminar kaba ar sngi halor ka phang “Leveraging Externally Aided Projects in the North East”, kaba la plie paidbah da ka Myntri Pla Tyngka ka Sorkar Pdeng, ka Nirmala Sitharaman, ha ka sngi Thohdieng, ka la poi sha kaba kut hynne ka sngi Saitjain.
Ha kane ka jingïalang la ïadonlang ka Myntri Pla Tyngka ka Ri, ka Nirmala Sitharaman, bad u Myntri Rangbah ka Meghalaya, u Conrad K Sangma.
Haba kren ha kane ka jingïalang, u Myntri Rangbah ka Jylla Conrad K Sangma u la ong ba kane ka seminar, kaba la pynlong hapoh ka jingïalam jong ka Myntri Pla Tyngka, ka long ka sienjam kaba kongsan bha na ka bynta ka thaiñ Shatei Lam Mihngi. U la ong ba ka jingïashim bynta jong ki Myntri Rangbah na ki jylla bapher bapher ka pyni shai ïa ka jingdonkam jong ki Externally Aided Projects (EAPs) bad ka jingkut jingmut ban pynlong ïa kane ka seminar kaba seisoh.
“Ka jingthmu jong kane ka seminar kam dei tang ban ïakren halor ka jingïoh pisa hynrei ban tei ruh ïa ki jingïatreilang, ban pynkhlaiñ ïa ka bor treikam jong ki jylla bad ban pynjan ïa ka jingïadei hapdeng ki jylla bad ki tnat treikam jong ka Sorkar Pdeng,” la ong u Conrad.
U Myntri Rangbah u la ai khublei ïa ki tnad bapher bapher bad ïa ki ophisar sorkar na baroh phra tylli ki jylla ka thaiñ Shatei Lam Mihngi kiba la trei shitom ban poi sha ki thong ba la buh.
U la kdew ba ka jingtei ïa ka jingïadei kaba skhem bad ka jingshaniah hapdeng ki ophisar, ki tnat sorkar bad ki jingïatreilang bapher bapher ka long kaba kongsan bha namar kine ki jingïadei ki don bynta ha ka jingai rai halor ki kam pynroi. U la ong ruh ba kane ka seminar ka ai ïa ka lad kaba bha ban pynkhlaiñ ïa ka jingïatreilang bad ka jingshaniah na ka bynta ka jingmyntoi jong ka thaiñ hi baroh kawei.
Shuh shuh, u Myntri Rangbah u la kren halor ka jingdonkam ban don ka jingïatreilang hapdeng ki jylla ban nang pynïar ïa ki jingïakren bad jingïatrei lang ha ki bynta kum ka jngohkai pyrthei, ka jingkylla jong ka suiñbneng bad ki kam kiba ïadei bad ki samla.
U la ban jur ruh ïa ka bynta kaba kongsan jong ki EAPs ha ka jingpynkhlaiñ ïa ka bor treikam jong ki jylla, kaba wanrah ïa ka jinglah ban pyntreikam kham bha ïa ki projek bad ban ïoh kham bun ki skhim na ka Sorkar Pdeng.
Ha kaba kut jong ka jingkren jong u, u Myntri Rangbah u la ai khublei ïa baroh kiba la ïashim bynta ha ka seminar namar ki jingai jingmut bad jingïasyllok jong ki. U la ong ba ka sienjam kaba bud mynta ka long ban pyntreikam ïa ki jingai jingmut bad ki rai kiba mih na ka seminar khnang ban wanrah ïa ki jingmih kiba shisha.
U la pynpaw ruh ïa ka jingsngewnguh kaba khraw ïa ka Myntri Pla Tyngka ka Ri, ka Nirmala Sitharaman, namar ka jingïalam lynti, ka jingshimkhia bad ka jingsngewkhia jong ka na ka bynta ka roi ka par jong ki jylla ka thaiñ Shatei Lam Mihngi.