Dei ha u snem 1987 bajur bha ka jingïakhih beh bar jylla bad kyllon ïap u Paul B. Makri ha ki kuli CRPF: KSU

Shillong, Jylliew 20: Ka KSU Western Border Area Unit ha ryngkat bad ka KSU Umrit Unit, hapoh ka jingïalam u Education Secretary ka KSU Western Border Area Unit, u Samla Shootingstar Thangkhiew, bad u President ka KSU Umrit Unit, u Samla Stoning Mawïong, ki la pynlong ïa ka prokram kynmaw burom ïa u Samla Paul B Makri.
Ha kane ka jingleit pynlong ïa kane ka prokram la donlang bad ki dkhot jong ka KSU Umrit Unit, ha kaba ki la leit ha ka ïingsah jong u Samla Paul Biswal Makri bam kwai ha dwar U Blei, ban ai ka jingburom bad ka jingkynmaw ieid ïa une u Samla ha ka jingdap 39 snem naduh ka jingkhlad noh jong u.
U Samla Biswal Paul Makri u dei u riewïaleh ka KSU uba la phah ïa la ka jong ka jingim na ka bynta ka jingshngaiñ ka Jaidbynriew Khasi. U samla Paul u dei na ka shnong Umrit na Western Ri Bhoi bad la kha ïa u ha u snem 1971.
Ha u snem 1987 ka la don ka jingïakhih kaba jur bha ha sor Shillong ban ïakhun pyrshah ïa ka jingthombor ki poiei kiba la shoh la dat ïa ki samla Khasi, knieh ïa ki jaka puta ki Khasi bad kiwei kiwei ki kam pyntriem ha katei ka por.
Ïa ka jingïakhih la pynlong da ka KSU hapoh ka jingïalam u Bah Bull N Lyngdoh bam kwai ha dwar U Blei. U Paul Makri u dei u volunteer ka KSU bad ha kato ka por u sah wai ha Jaïaw ha ïing jong ka Kong (Dr.) Garod.
La ïathuh ba ha ka 15 bad 16 tarik u Jylliew ki pulit CRPF ki la synreit kuli pathar ïa ki dkhot ka KSU bad ki paidbah ha kylleng ka sor Shillong ha kaba bun ngut ki la mynsaw jur.
Shuh shuh la ïathuh ruh ba wat hapdeng ka jingpyntieng kohtympan ki bor sorkar da ki suloi, ki dkhot ka KSU bad ki paidbah kim shym la kynran dien bad la ïai bteng ïa ka jingïakhun ha ka sngi kaba bud kata ka 17 tarik u Jylliew ka dei ka sngi kaba sngewsih ïa ka ïing ka sem u Biswal Paul Makri ha kaba ki pulit CRPF ki la synreit kuli ïa u bad ïa kiwei ki paidbah ha kaba bun ngut ki mynsaw bad ar ngut ki la kyllon ïap hajuh kynthup ïa u Samla Paul B Makri.