Balei 4 snem ym lah eksamin ka Sorkar ïa ka jingdawa ba shongnia ki nonghikai: HM Shangpliang
![](https://mawphor.com/wp-content/uploads/2022/07/mawphor-1.jpg)
Shillong, Naitung 20: U MLA jong ka seng AITC uba mih khmat ïa ka Mawsynram Constituency u Bah Himalaya M Shangpliang ha ka sngi Balang u la buh jigkylli ïa ka jingbym lah shuh ka sorkar ban pynurlong ïa ki jingdawa ki nonghikai SSA kiba ki la buh ha khmat ka sorkar la saw snem mynshuwa.
“Ngam sngewthuh kaei ka daw ba ka sorkar kam lah ban pynurlong ïa ka jingdawa ba shongnia kaba ki la buh la saw snem mynshuwa bad lada ngi kylli ha ka Ïing Dorbar na u Myntri ka Tnad Pule Puthi ka jubab kaba u ai ka long beit ba ka sorkar ka dang eksamin ïa kane ka kam” ong u Bah Himalaya haba kren bad ki nonglum khubor ha ka jingleit ai jingkyrshan ïa ki nonghikai kiba ïakhih da kaba shong sah miet ha jaka pynieng kali ha syndah ka Addtional Secertetariat.
U Bah Himalaya u la kyntu ruh ïa ka sorkar ba kan kakren bad ki nonghikai ym ban shu sngap mynthi ïa ka jingdawa jong ki.
“Ka sorkar kam lah ban siew tulop haduh san bnai ïa ki nonghikai da kaei pat kin ïa bam. Lada ka sorkar kam lah shuh ban peit ïa ka jingeh jong ki skul bad ki nonghikai khang lut noh ïa ki skul SSA” ong u Bah Himalaya.
Shuh shuh u Bah Himalaya u la buh jingkylli shaei ka pisa kaba ïoh na ka sorkar pdeng bad ka pisa na ka bhah ba dei ban siew ka sorkar jylla halor ka jingbym siew tulop ka sorkar ïa ki nonghikai da san bnai.
U Bah Himalaya u la ong ruh ba ka sorkar ka dei ban weng noh mardor ïa ka jingeh ki nonghikai namar kan pynduhnong ïa ki khynnah skul namar ha u 2020 bad 2021 ki duh jinghikai na ka daw ka jingkhang dam, mynta pat kin duh jinghikai na ka daw ba ki nonghikai ki hap mih sha madan ban ïakhih ban dawa ïa ka hok jong ki”
Shuh shuh u Bah Himalaya u la ai ka jingkular ba un ïai long ka sur jong ki nonghikai ha ka Ïing Dorbar ThawAiñ ka jylla.