Nongpoh, Jylliew 19: Uwei u rangbah u la mynsaw ha kawei ka jingjia aksiden kaba la jia ha ka miet jong ka sngi Palei ha surok bah National Highway ha Nongpoh, hadien ba kawei ka kali Tata Punch ka la leit ban tynrah nadien ïa kawei ka truck dumper kaba dang ïaid ha surok.
Katkum ki khubor ba la ïoh lum, la ong ba kane ka jingjia ka la jia kumba ha ka por 10 baje eiei mynmiet ha kaba katei ka truck dumper kaba don ïa u registration number ML 11 A 2486 ka dang kit mawria na Killing ban leit pynhap sha Pahamsyiem. Katba ka dang ïaid suki ha surokbah, kawei ka kali Tata Punch kaba don ïa u registration number ML 10 D 6974 ka la wan kynsan bad tynrah beit nadien ïa katei ka truck.
Namar ka jingjur jong ka jingtynrah, ka bynta ba shakhmat jong ka Tata Punch ka la julor bad pra phum, bad u nongñiah jong ka kali u la mynsaw ha kane ka jingjia bad la pynkit noh mardor ïa u nongñiah sha Civil Hospital Nongpoh ban ïoh jingsumar.
Na ka liang ki pulit traffic jong ka Nongpoh Police Station ki la poi mar mar sha ka jaka ban pynlong ïa ka jingtohkit bad la tan noh ïa kitei ki artylli ki kali sha thanad bynta ban leh ïa kaba donkam katkum ka aiñ.
