Shillong, Naitung 20 : U Myntri ka tnad pule puthi haka jylla u ma Lahkmen Rymbui mynta ka sngi Balang u la kyntait ïa ka kaiphod kaba la pynmih ba ka Meghalaya ka wan ha ka kyrdan kaba sha tduh ha ka pule puthi ha ka ri baroh kawei. Kane ka long naduh ka Performance, Infrastructure and Equity (PIE) Index 2020-21 naduh ki Primary haduh ki Secondary.
ïa kane ka kaiphod la pynmih da kaba jer PIE Index 2020-21 kaba la pynmih da ka Oberver Research Foundation (ORF)
“ Kane ka kaiphod ka dei kaba la leh da ki riew shimet ne da ka tnad jong ki riew shimet ym dei da ka tnad pule puthi jongka sorkar pdeng. Namar ka tnad pule puthi ka ju ai kyrdan kat kum ka Performance Grading Index (PGI)” ong u ma Lahkmen.
Tangba u la ong pat, kaei kaba ki la pynpaw ha ka kaiphod ruh kam mut baroh kim long kiba shisha “Namar haba ngi la shimti ïaka sorkar ngi lap ba ki don bun kiei kiei kiba dei ban leh ha ka tnad pule puthi bad ki don lai tylli ki paia ban pynïeng khnang ba ka pule puthi kan khlaiñ kata ka long ban kyntiew kyrdan ïa ka pule puthi donkam ruh ban pyntbit shwa ïaki nonghikai bad kumjuh ruh ban pynbha ïa ki skul”. ong u ma Lahkmen.
U la ong kaba kongsan lei lei ka dei ka jingpynbha ïaki skul. “ Kumba phi la tip bad ïohi ba ki ïing skul ha ki Primary ha baroh kawei ka jylla kim long shuh kiba bha. Kumno phi pyrkhat ban ai jinghikai online ne digital classroom haba ka tnum skul ka la pei ne kam don shuh ne jingkhang ruh ym don shuh?” kylli u ma Lahkmen.
U la ong ba hak ine ki ar-lai snem ka sorkar ka la rai ban pynbha shwa ïa ki skul ha ka jylla bad na kata ruh ka daw u myntri rangbah ula pynbna ban pynbha ïa kumba 1800 tylli ki skul.
