Ban tehlakam kiba kwah laisen khaïi thymmai kin hap wan beit sha ophis: CEM

Shillong Jylliew 18: U Chief Executive Member (CEM) ka KHADC u Bah Winston Tony Lyngdoh u la ong ba ka Executive Committee jong ka KHADC ka dang bishar ha kaba ïadei bad ka jingdonkam ban wanrah ïa ka rukom treikam online hapoh ka tnat Trade bad kam pat don kano kano ka Committee ne ka jingtyrwa watla ka la don ka jingïasyllok bad jingïakren bad ka NIC ban pyntreikam online hynrei khlem pat ïaid shakhmat.
Ïa kane u la jubab ïa ka jingkylli ba la wanrah da u MDC ka Laban-Mawprem u Bah Ricky Shullai hapoh ka Dorbar lyuir jong ka KHADC ha ka sngi Palei.
U Bah Ricky Shullai haba buh ïa kane ka jingkylli u la pynpaw ïa ki jingeh naba bun ki Rangbah Shnong ki pynsngew ba bun ki nongkhaïi kiba dei ki bar jylla kim pynthymmai ïa ki laisen khaïi bad kumjuh ruh ki pynpaw ba ka shim por da kiba bun snem ïa ka Council ba kan pynthymmai ïa laisen jong ki.
Katba u nongïalam ka Liang Ïatei u Bah Titosstarwell Chyne u la kylli halor kiei ki jingmyntoi ban ïoh lada pyntreikam da ka online, nangta kaei ka kyrdan jong ka aiñ ne kaba lah ban pynïaid ïa ki bar jylla ne ïoh ka long ka jingkhang ïa kiba nabar ban ïoh pynthymmai laisen khamtam eh lada ym don ka jingpyrkhing ban pynduna ai laisen khaïi thymmai lada ki Khasi ki la lah ban trei ïa ki kam khaïi.
Haba jubab u CEM u la ong ba kumba long mynta ym pat don jingmut ban ïaid shakhmat namar lada pyndonkam online kan long kaba ïar bha, kan eh ïa ka lawei namar ki don bun ki jingmang pisa la kajong.
“Ïa mynta lah ban pyndonkam tang ïa ka renewal ym lah ïa kiba applai thymmai bad ka jingmyntoi na ka online ka long ban tehlakam, ban pynsted, pynsuk ka renewal, ban siew pisa, ban lap ïa ki application, nangta katno tylli ki renewal ki la don bad katno tylli ki sahkut, ka jinglait tuh ka khajna, nangta ki nongtrei kin ïoh treikam lyngba ki computer bad kiwei,” ong u CEM da kaba kren shai pat ba ka online kan long beit tang ïa ka renewal hynrei ia kiba pan laisen khaïi thymmai kin hap wan kynduh ïa ki nongtrei ka Trade ban lah tehlakam, hynrei ym lah ban aplai online.