Kumba 12 klur tam dang sahkut ka bhah pisa KHADC ïathuh u EM Development

Shillong, Jylliew 18: U Executive Member jong ka KHADC uba khmih ïa ka tnat Development u Bah Powell Sohkhlet u la ïathuh hapoh ka Ïingdorbar Lyuir ka KHADC ba ka Sorkar pdeng lyngba ka Ministry of Panchayati Raj ka la dep ban pynlait ïa ka pisa kaba T. 12 klur tam ki skhim pynroi ha ka 19.02.26 jong ka 15th Finance Commission ka 2nd Installment Untied Grant jong u snem 2021-22 bad ïa kane la phah sha ka sorkar jylla hynrei na ka liang ka KHADC haduh mynta kam pat ïohpdiang satia ïa katei ka pisa.
Ïa kane u la jubab ïa ka jingkylli ba la wanrah da u MDC ka Mawshynrut u Bah S Rashir halor ki skhim da kaba ong ba haduh mynta kum u MDC la shisnem tam ki briew ki la dait ïa ki skhim MDC.
Shuh shuh na ka liang u EM u Bah Sohkhlet ula ïathuh ba ka 15th Finance Commission ka la kut ha ka 31 tarik u bnai Lber 2026, mynta pat ka la wan sa ka 16th Finance Commission bad u la kyrpad ïa baroh ki MDC ba kin summit biang ïa ki proposal ban pynrung noh hapoh ka 16th Finance Commission.
Haba jubab la ki proposal ba la dep ban thep na ka bynta ka 15th Finance Commission yn duh noh ne yn dang ïoh, u EM ba ym dei ban duh jingkyrmen naba ki don ki projek hapoh kane ka Commission ki dang ïaid.
Halor ka jingkylli na u nongïalam ka Liang Ïatei u Bah Titos Chyne la u EM u la buddien ne em bad ka sorkar jylla balei ka pynslem ban pynlait ïa ka pisa kaba T. 12 klur tam, u EM u la ïathuh ba la dep ban ïakynduh teng bad u Myntri ka tnat DCA u Bah Prestone Tynsong bad u la ong ban pynlait noh hynrei ym pat poi ne transfer haduh mynta sha ka Account jong ka Council.
“Ngi dep leit ruh shaduh Delhi ban kynduh ka Myntri ka tnat Pla Tyngka, nangta ïa ki ophisar ka tnat Finance halor ki Grant bad ha ka 5 tarik u Jylliew la ïoh ka shithi ba la mang pisa bad ka tnat Development ka la phah ruh ki shithi sha u Secretary ka tnat DCA ka sorkar jylla bad la don kumba haduh 4 sien ba la phah ïa ki shithi, ngi la ïoh ruh ki jingpynthikna,” ong u EM.
Haba jubab bynrap ïa kane na ka liang u CEM u ïathuh ba u EM manla ka 2 sngi u la phone marmet sha ka tnat DCA, hynrei la ïathuh ba ka pisa ka sahkut hapoh ka tnat Finance ka sorkar jylla.