Naduh 2024 la aiwai ïa ka KTMI ha Lumsohpetbneng hynrei khlem pat ïoh baiwai ka KHADC: CEM

Shillong Jylliew 18: U Chief Executive Member (CEM) ka KHADC u Bah Winston Tony Lyngdoh ha ka sngi Palei u la pynpaw ka jingsngew khia kaba jur bha haba ka Executive Committee ka la lap ba ïa ka Khasi Traditional Medicine Institute (KTMI) kaba don ha u Lumsohpetbneng lah dep ban aiwai naduh ka 26 tarik u Naitung 2024 sha ka Centre of Learning and Knowledge Services ha ka dor kaba T. 6 lak shisnem bad la ai wai ruh ha u nongkhmih katei ka Centre u Vijay Prasad.
Ïa kane u la jubab ïa ka jingkylli ba la wanrah da u MDC ka Laban-Mawprem u Bah Ricky Shullai uba la pynpaw ruh ka jingsngewkhia haba jur ban ïohi ïa ka jinglong jingman katei ka jaka sumar bad ai dawai kynbat Khasi kaba la kylla ïingjah bad la julor bun ki jingtei da kaba ïathuh ruh ba ïa katei ka institute ne ka hospital sumar Khasi la tei naduh u snem 2017-18.
Halor kane u CEM u la pynpaw ka jingsngewkhia naba ka KHADC haduh mynta ruh Kam pat shym la ïoh wat tang shisien ruh ka bai wai na utei u Vijay Prasad bad wat hadien ba la dep jurip arsien ym pat ïoh ki kaiphod.
“Ka KHADC ka la pynlut haduh T. 9.47 klur ban tei ïa katei ka jaka sumar dawai kynbat Khasi hynrei hadien ba la dep shna la aiwai pynban sha uwei u briew ha ka dor T. 6 lak shisnem bad ka jingmynjur haduh 20 snem bad haba nga leit jurip la ïohi kumba kadei ka ïingjah, ym don nongtrei bad kam idei shuh kum kata ka centre. Ka ïing ba la tei da ka council ka la jot la pra kaba ma ïoh ka kylla long kum ka jingkieng Kalong bad kan long ka jingma ïa ka EC lada kam leh eiei bad ha ka institute kam don shuh ka jingtreikam kaba biang bad kam long shuh kum ka mynnor,” ïathuh u CEM.
U la ïathuh ba u la dep pan ïa ki kot ki sla halor kane ka kam bad la dep phah haduh 3 bad 4 sien ki jingpynkynmaw ïa u Prasad ban phah siew ïa ka bai wai naba naduh ka Sngi ba la shim wai khlem pat siew wat shi tyngka ruh sha ka Council.
“Hadien ba la ïohi bym don ka jingsuit ñiew uba shim wai, nga la khot hajir ïa u Prasad ha kaba u la ïathuh ba ka la dep don da ka jingïatehkular ne jingmynjur bad lehse dei na kane ba u la ïoh ban leh katba mon. Kaba lyngngoh ka long bad wat ki dkhot jong ka KTMC ruh kim don jingtip ïa kane ka Agreement, kumta hadien ba la kut kane ka dorbar lyiur ngan sa khot hajir biang ïa u,” kular u CEM.
U CEM u la ïathuh ruh ba utei u nongshim wai u la dep ruh ban pynkheiñ bun tylli ki Agreement bad na ka liang ka council kan ïaid noh da ka lynti ka aiñ ban ïoh biang ïa katei ka jaka kaba dei ka nongkynti jong ka KHADC.
Haba u nongïalam ka Liang Ïatei u Bah TW Chyne u la kylli la ka Council kan dang lah ne em ban phah pynphai biang ïa katei ka jaka, u CEM u la ïathuh ba kan shem jingeh namar ka agreement ruh ka dei kaba la ïateh kaba don lang ki bynta jong ka aiñ kaba pynwit hynrei ka Council kan hap ïaid lang da ka aiñ lada ka don ka jingbym mynjur u Prasad ban pynphai biang.
“Kan ym don jingeh than naba u la pynkheiñ ïa ki jingïamynjur naba u khlem siew bai wai,” ong u CEM da kaba pynpaw ba ka Council tang shu la ïoh biang kan shimti noh ban pynïaid naba ka don ka jingthmu ban kyntiew ïa ki nongai dawai bad nongsumar kynbat Khasi kumta ka council kan ym randien kan ïakhun haduh ban da ïoh biang ïa katei ka jaka.
Haba jubab ïa ka jingkylli ka MDC na Nongshken ka Kong Grace Mary Kharpuri u CEM u la ong ba ka don ka jingpynshlur ïa ki nongai dawai kynbat ban ithuh bad ban pynrung kyrteng hapoh kane ka institute bad kumba long mynta ki la don 102 ngut kiba la register na ki 125 tylli ki application.
Haba jubab pat ïa u MDC na Shella u CEM u la ïathuh ba katkum ki proceeding KTMC kam don jingtip ïa kata ka jingïasoi soskular naba la leh tang da u Secretary barim u Bah G Syiemïong bad Bah C Pohlong, Bah A R Kharshandi bad u Vijay Prasad.
“Kane lah ban dei kaba ka la ïaid na lyndet naba baroh ki dkhot KTMC kim tip bad ki la don ruh ki jingpynkheiñ ïa ki agreement bad ka lah ban dei ba la leh da jingbthah jongno jongno na ka bynta ka jingmyntoi jongno jongno,” ïathuh u CEM.
Katba u Nongïalam ka Liang Ïatei u la pynpaw ka jinglyngngoh naba ka KTMC kadei ka Commission kaba laitluid u Secretary ka KHADC um donbor ban soi agreement.