Wan tuklar bad tam pud ka Municipal ha u pud u sam ka khyrnit ba hynriew lyngba ka 15 Finance Commission

Shillong, Jylliew 18: Ka Executive Member ba dei peit ïa ka tnad Legal Affairs jong ka Khasi Hills Autonomous District Council (KHADC) Kong Deity H Majaw ka kyrshan pura ïa ka motion ba la wanrah da u MDC ka liang pyrshah u Bah Ricky Shullai halor ka phang u pud u sam jong ka Sixth Schedule kiba hap hapoh ka Khasi Hills Autonomous District Council.
Haba jubab na ka liang jong ka Executive Committee ka kong Majaw kala ong, “Nga kyrshan ïa ka motion ba la wanrah bad ka long kaba donkam ban dang pynkhlain shuh shuh ïa ka KHADC”.
Shuh shuh ka kong Majaw kala ong ba ka long kaba donkam ban leh ïa ka map kaba biang ban lait ka jingiakynad ne na ka jingshah tam pud ha kiwei pat ki bor kum ka tnad Municipal.
“Ngi sngewthuh bha ïa kane ka mat, ym dei ba ngi shu shong matlah halor ka jingïada bad pynneh pynsah ïa ki riti ki dustur bad kala pynpaw ruh ka jingsngewkhia halor kane ka mat bad bunsien ngi ïa tyngkhuh” ong ka kong Majaw.
Shuh shuh ka kong Majaw kala ong ba wat ka tnad Municipal ka wan ïa knieh ïa ki schme pynroi bad ka long kaba donkam ban pynbeit bad ngi lah ban pynsngew halor ka jingiatyngkhuh ka KHADC bad ka Municipal.
Na ka liang u Bah Ricky Shullai naduh u snem 1826 ha ka por jong u sahep David Scoot ba shna ïa ka surok na Sylhet ban poi sha Brahmaputra lyngba ka Khasi Hills ngi la shah ktah ïa u pud u sam, kaba la pynlong ïa u Syiem Tirot Sing ban ïakhun pyrshah, u Woh Kiang Nangbah ruh u hap ban ïakhun bad kumjuh ruh u Pa Togan Sangma.
Shuh shuh u Bah Ricky u la pynpaw ruh ba balei ban pdiang ban rung ha Panchayati Raj lyngba ki scheme 15 Finance Commission namar ba ngi dei ban buh shwa ha khmat eh ïa ka jaitbynriew.
“Halor ka Municipal u Bah Ricky u la ong ba ka 16 Finance ym dei ban pdiang lada ki pyniahap hapoh ka Panchayati Raj” u la ong bad bynrap ruh “halor u pud u sam jong ka khyrnit ba hynriew donkam ban pynneh pynsah bad ban ïada ïa ki riti dustur bad ki aiñ” u la ong.
Na ka liang u Bah Titos W Chyne haba kyrshan ïa kane ka mation u la ong, Ka Municipal Board kala wan ban tuklar bad tam pud lyngba ka 15 Finance Commission.
“Lada pyntrei kam ïa ki scheme hapoh u pud u sam jong ka KHADC da kiwei pat ki tnad kata ka long ka jingïuhroit” ong u Bah Titos.
Kiba kyrshan ïa kane ka motion ki kynthup ïa ka MDC ka NPP na Nongshken ka Kong Grace Mary Kharpuri, ka MDC na Nongpoh ka Kong Rona Khymdeit bad u Bah Shemborlang Rynjah u MDC ka VPP na Langkyrdem Laitkroh.