Naduh 20 tarik Jylliew yn sdang ka Special Intensive Revision (SIR) jong ka Electoral Roll ha Meghalaya: CEO

Shillong, Jylliew 17 : Ka Special Intensive Revision (SIR) jong ka electoral roll ha Meghalaya kan sdang naduh ka 20 tarik Jylliew, katba ïa ka electoral roll ba khatduh yn pynmih paidbah ha ka 07 tarik Risaw, 2026, pyntip da u Chief Electoral Officer (CEO) ka jylla, u BDR Tiwari.
Da kaba pynbna ïa ka por treikam katkum ka prokram jong ka Election Commission of India (ECI), u Tiwari u la ong ba kane ka jingpynbeit thymmai ïa ka electoral roll kan sdang da ka bynta kaba nyngkong naduh ka 20 tarik haduh ka 29 tarik Jylliew, nangta yn bud sa ka jingpynshisha pat na kawei ka iing sha kawei pat.
“Ka kylla ba nyngkong kan long naduh ka 20 haduh ka 29 tarik Jylliew. Hadien kata, naduh ka 30 tarik Jylliew haduh ka 29 tarik Naitung (July), ki Booth Level Officer kin leit jurip ha man la ki iing,” u la ong.
Shuh shuh u la ïathuh ba ïa ka draft electoral roll yn pynmih paidbah ha ka 05 tarik Nailar (August) 2026, kaba ai lad ïa ki paidbah ban peit bniah bad ban ai jingtip lada don ki jingbakla.
“Ka jingpynbna ïa ka draft publication kan long ha ka 05 tarik Nailar 2026 bad hadien kata, naduh ka 05 tarik Nailar haduh ka 04 tarik Nailur (September) 2026 yn ai por na ka bynta ki jingpynbeit,” la bynrap shuh shuh u CEO.
U la ong ruh ba ka jingpynbeit ïa ka electoral roll kan poi sha kaba kut da ka jingpynmih paidbah ïa ka roll ba khatduh ha u bnai Risaw.
“Ka final publication jong ka electoral roll kan long ha ka 07 tarik Risaw 2026, bad ka tarik ba la buh na ka bynta ka SIR kan long ha ka 01 tarik Risaw 2026,” la ong u Tiwari.
Da kaba ban jur ba ka jingtrei halor kane ka kam ka dang ïaid shakhmat mynta, u la ong, “Ngi la sdang ïa kane ka SIR bad kane ka kam kan dang ïai bteng.”
U Tiwari u la ong ruh ba ka jingpynbeit thymmai ïa ka electoral roll kan long katkum ki kyndon bad ka hukum jong ka Election Commission ban pynthikna ïa ka jingbeit bad ka jingshisha jong ka jingthoh kyrteng ki nongthep vote.
Ka SIR ka thmu ban pynbeit thymmai ïa ka electoral roll shuwa ki elekshon ban wan da kaba pynrung ïa ki nongthep vote kiba dang thymmai bad kiba la dei hok, ban pyndam ïa ki kyrteng jong kiba la khlad noh lane ki kyrteng ba la pynkynriah shawei, bad ban pynbeit ïa kino kino ki jingbakla lyngba ka jingjurip jong ki Booth Level Officer ha baroh ka jylla.