Da u motdur ba shirynïeng pura jong u Kiang Nangbah thmu ka sorkar ban pynïeng ha Jowai

Shillong, Jylliew 17 : Ka Sorkar Jylla lyngba ka tnat Arts and Culture ka la pynkhreh mynta ban pynïeng noh da u mot dur ba shirynïeng jong u Woh Kiang Nangbah uba dei u khlawait ba ïakhun thma pyrshah ïa ki nongwei na ka bynta ka jingïoh laitluid jong ka Jaidbynriew.
Ïa une u mot dur la pynkhreh ban pynïeng ha Sawlad, Jowai ha ka jaka jong ka tnat Transport kaba don artad mar pyrshah bad ka Kiang Nangbah College.
Ban pynïaid stet ïa ka kam, na ka liang u Myntri ka tnat Arts and Culture u Bah Sanbor Shullai ryngkat bad u Myntri ba dei u MLA ka Jowai, u Bah Wailadmiki Shylla ha ka sngi Balang ki la hiar ban jurip ïa jaka ban pynïeng ïa u mot dur ba tip kum ka Kiang Nangbah Square. Ha kane ka jingjurip, la synran lang ruh ki engineer na ka tnat Tourism, ki ophisar, ki nongïalam shnong ka Mihmyntdu, ki dkhot ka Synjuk ki Rangbah Shnong ka Sor Jowai bad ki nongïalam ka Jaiñtia Students Union (JSU).
Haba kren bad ki lad pathai khubor u Bah Sanbor u la ong ba ka tnat ka la pynkhreh ban pan ka jaka 10,000 square feet na ka tnat Transport na ka bynta katei ka kam. “Ha kane ka jaka ban pynïeng ïa u motdur yn tei ruh ïa ka kynja park ne jaka shongkai pyngngad, ki jaka ban buh ïa ki mawkyrteng ban ïathuh shaphang ka jingim jong u Woh Kiang Nangbah bad kiwei kiwei ban khring ruh ïa ki nongjngohkai pyrthei,” u la ong.
U Myntri u la ong ba ka jingthmu ban pynïeng ïa u mot jong u Woh Kiang Nangbah ka long ruh ban pynkynmaw ïa ki pateng ba hadien shaphang ki khlawait kiba la ïakhun na ka bynta ka ri bad ka jaidbynriew.
Haba kylli kaei ka daw kaba pynlong ïa u ban shimkhia ïa kane ka kam, u Bah Sanbor u la jubab da kaba ong, “Ha State Central Library Shillong u don u motdur ba shi rynnïeng jong ka Indira Gandhi bad u Subhash Chandra Bose hynrei jong u Tirot Sing, Kiang Nangbah bad Pa Togan u don tang uwei u maw kyrteng ïa ki bad wat u motdur jong u Babu Soso Tham ruh u don uba tang shiteng. Ha ka por jong nga, ngi la lah ban pynïeng ïa u motdur ba shi rynnïeng jong u Tirot Sing, Kiang Nangbah bad Pa Togan. Kumta kane ka jingpynïeng ïa u motdur jong u Kiang Nangbah ruh kadei da ka jingai jingmut jong kiba bun ki samla samhoi bad ngi ïaid beit ha ka nongrim ban trei beit da ka kam bad ban pynduna ïa ka jingkren.”
Na ka liang u Bah Wailad Shylla, u la pynpaw ba kane ka jingkwah jong ka thaiñ ka dei kaba la slem bha ban pynsahnam ïa u riew ïaleh bad u riewkhraw kiba ka rilum Jaiñtia ka niewburom bha. U la pynkynmaw ba kane ka jingthmu ka la ïaid naduh u snem 2022 bad pynpaw ka jingkyrmen ba mynta ka kynti yn lah ban pynurlong, bad ïa katei ka jaka yn sa jer noh da ka Kiang Nangbah Square.
Shuh shuh u la pynpaw ïa ka jingsngewnguh ïa u Bah Sanbor Shullai, ki nongïalam shnong, ka Jaintia Students Union bad kiwei kiwei kiba pyni ïa ka jingkwah jong ki ban ïoh ïa ka jaka ban pynsah kynmaw ïa u khlawait ba ka Jaidbynriew ka pynmih.
“Kane ka jingwan jurip ka long ban ai ka jingpynshai ïa jingdonkam ïa ka jaka khnang ba ka MTC kan ïoh ban rah pat ïa kane ha ka jingïalang jong ka Board bad ngi lah ïalam ruh ïa ki Engineer ba kin khmih bniah bad ban pynkhreh ïa ka Detailed Project Report (DPR) bad nga dap da ka jingsngewkmen ba kane kadei kaei kaei kaba don ïa ka jingïadei kaban jan bha bad uwei pa uwei u nongshong shnong jong ka rilum Jaintia jong ngi,” la ong u Bah Wailadmiki.
Na ka liang ki nongïalam ka JSU ki la ai khublei ïa u Myntri bad ïa u MLA ka thaiñ kiba la shim khia ban jurip hi ïa katei ka jaka ban buh sahnam da u mot dur ba shirynïeng jong u Woh Kiang Nangbah.