Shillong, Jylliew 16: Ka Meghalaya Koch Students’ Union (MKSU) ka la dawa ban tohkit kaba bniah bad kaba khlem shah liang halor ka jingiap jong ki arngut ki samla Hajong, da kaba ong ba ka jingjia kala pynmih ïa ka jingsngewkhia kaba jur jong ki paidbah bad ba ka jingshisha ka dei ban ïalam lynti haba tohkit yn da ka jingmutdur.
Ha ka kyrwoh ka MKSU ka la ong ba ka don hapdeng ka jingkyndit, ka jingsngewsih, bad ka jingsngewkhia hadien ba lap ïa ka metïap jong ka kong Prinomi Hajong 22 snem na Balat bad ka Simanta Hajong 21 snem na Ranikor ha ka step jong ka 14 tarik Jylliew na Lumsohphoh, Nongthymmai.
Ka Union ka la phah ka jingsngewlem sha ki longïing bad ka la ong ba ka ïeng ha ka jingïatylli kaba pura bad ka jaidbynriew Hajong ha kane ka por ba sngewsih.Ka la ban jur ba ka jinglong jong ka jingjia ka dawa na ki bor ba dei khmih ban ïaid lait ïa ka rukom treikam haba tohkit.
“Da kaba pyrkhat ïa ka jingjia kaba sngewkhia, ka MKSU ka ngeit ba kane ka kam ka dei hok ban ïoh ïa ka jingtohkit kaba bniah, kaba shai, bad kaba khlem liang ban lap ïa ka jingshisha baroh” la ong ka khubor.
Ka la kyntu ïa baroh ki bor ba dei peit ban pynthikna ba ïa ka jingtohkit, ka jingpeit bniah ïa ka Post Mortem da ka rukom kaba tbit bad lait na kano kano ka jingpynbor na shabar.
“Ka jingshaniah jong ki paidbah ha ka tnat bishar ka shong ha ka rukom treikam kaba hok bad kaba lah ban ngeit kaba buh ïa ka jingshisha halor ka jingmutdur,” la ong ka Union bad bynrap ba baroh ki jinglap dei ban pynïaid bad pyntip da kaba shai katkum ki kyndon aiñ.
Ka MKSU ka la pynbor ruh ïa ka Sorkar ba kan leh da kaba tyngeh lada ka jingtohkit ka kdew ïa ka jingleh bymman, da kaba dawa ba dei ban leh da kaba tyngeh katkum ka aiñ pyrshah ïa kino kino kiba lap ba ki donkti.
Nalor kane ka Case, ka MKSU ka kyrpad ïa ka Sorkar bad ki bor jong ka aiñ ban pynkhlaiñ ïa ki lad jingïada na ka bynta ki trai ri trai muluk, ki jaidbynriew rit paid, bad ki jaitbynriew ba shah iehnoh beiñ ha kylleng ka Meghalaya.
Da kaba pynpaw biang ïa ka jingkyrshan ïa ki longïing kiba la duh noh ïa la ki baieid, ka MKSU ka kyrpad ïa ka jingsuk bad jingïatylli hapdeng ki jaidbynriew.
“Ym dei ban iehnoh ïa kano kano ka longïing khlem ka jubab. Ym dei ban shah kyntait ïa ka hok jong kano kano ka jaitbynriew” kala ong.
