SHILLONG, Jylliew 16: U Superintendent of Police (SP) ka East Khasi Hills u Bah Vivek Syiem u la ong ba ka jingiap jong ki arngut ki samla Hajong kiba la lap ïa ka met Ïap jong ki na kawei ka sem ha Lumsohphoh ka i kumba ka dei ka jingpyniap hi (suicide), hynrei ia ka daw tynrai yn sa lah ban pynthikna tang hadien ba la ioh ïa ka kaiphod post-mortem.
U Bah Syiem u la ong ba ki pulit ki la ioh jingtip ha ka por 7 baje mynstep ha ka Sngi U Blei, 14 tarik Jylliew, “ba don ar tylli ki met iap hapoh kawei ka sem ha Lumsohphoh ha syndah bad ka surok Shillong sha Jowai bad ba ïa ki met ïap la lap ryngkat bad u tyllai ba la teh na ryndang.”
“Mar mar ki ophisar bad ki nongtrei na Laitumkhrah Police Station ki la leit bran bran sha katei ka jaka bad la khot ia ki forensic, ki senior ophisar na ka District ruh ki la poi sha katei ka jaka bad ki la jurip ïa katei ka jaka”, u la ong haba kren sha ki nongthoh khubor.
U la ong ba ym shym la lap ïa ki dak mynsaw nabar.”Ym shym la lap ïa ki dak mynsaw ha ki met ïap, ka kynhun forensic ka la don bad ka la bishar bniah la ka dei ka jingpynïap lade ne da kumwei pat, ka jingtohkit ba la pynlong ka la pyni ba baroh ki dak jong ka jingpynïap ïalade hynrei ïa kajuh yn sa pynthikna ynda la ioh pdiang ïa ka report jong ka post mortem.”
Halor kane ka jinglap ia kitei ki met ïap la register case ha Laitumkhrah Police Station.
“Ngi la register ïa ka case jong ka jingïap (unnatural death) ha Laitumkhrah Police Station.Kumta shisien ba la ïoh ïa ka kaiphod jong ka post mortem bad pynshisha ïa ka jingpynïap ïalade ne da kumwei pat, katkum kata ki pulit district kin ïaid shakhmat bad ka jingtohkit.Kyrmen ba hapoh shi taiew, ngin sa ioh ïa ka report,”
