La nang kiew ki rukom treikam ka MIDC ban kyntiew ïa ki samla ba kwah sengkam lajong: Bah Gavin

Shillong, Jylliew 15: U MLA ka Sohra bad kumjuh ruh u Chairman bathymmai jong ka Meghalaya Industrial Development Corporation Ltd u Bah Gavin Mylliemngap, u la pynpaw ka jingsngew skhem ba ka MIDC lyngba ka jingïatreilang bad synniang lang ka lah nangkiew ha baroh ki liang la kadei ha ka ïoh ka kot ka jylla bad khamtam ki samla kwah sengkam lajong.
Ïa kane u la kren ha ka prokram pdiang sngewbha jong ka Board of Directors bad ki nongtrei jong ka MIDC ïa u kum u Chairman bathymmai hadien ba la iehnoh kam u James K Sangma kum u Chairman ka MIDC hadien ba u la shah jied noh kum u MP bathymmai jong ka Rajya Sabha na jylla.
U Bah Gavin Mylliemngap u la pynpaw ba ki don bun ki jingtuklar hapoh ka MIDC bad ki projek kiba bun kiba dang hap buddien, kumta u la kyrmen ba lyngba kane ka corporation yn nanglah ban kyntiew ïa ka ïoh ka kot ka Jylla kaba la buh thong ban pynpoi sha ka 10 billion dollar ecomomy hapoh u snem 2028.
U la pynpaw ruh ïa ka jingdonkam ban kyntiew ïa ki samla ha ka jingseng kam la jong naba 72% ha jylla dei ki samla hapoh ka 35 snem, kumta da ka jingïatreilang ki Co Chairman, Vice Chairman, ki ophisar bad baroh ki nongtrei yn sa lah ban kyntiew shuh shuh shajrong ïa ka MIDC.
Katba u Bah Ransom Sutnga uba dei u Co Chairman haba kren pdiang u la ong ba ka MIDC mynta la kumba 3 snem tam naduh ba u la don lang ha kane ka jaka treikam, ka la sdang ban kiew ha kiba bun ki rukom treikam, khamtam hadien ba la shimti u James K Sangma kum u Chairman ba la leit noh bad bun ki kam la lah ban leh, kumta u la pynpaw ka jingkyrmen ba nangne shakhmat hadien ba la shimti da u Bah Gavin yn sa nang ban lah ban kyntiew shuh shuh shajrong ïa kane ka Corporation da kaba plie bun ki lad ki lynti ïa ki khun samla.
“Ha kine ki snem ba la leit ngi la lah ban pynkhuid ïa kiba bun ki ram ki shah kiba la don naduh ki por kiba mynshwa bad kane ka pyni ïa ka jingsynniang, ka jingïatreilang kum ka kynhun jong baroh ba la lah ban leh ïa kane ka kam kaba la sahteng bad kumjuh ruh ban pyntyllun ïa kiwei pat ki projek kiba dang sah da kaba pynïaid ïa ki shakhmat,” ong u Bah Sutnga.
La pynïaid ïa ka prokram pdiang burom ïa u Chairman da u Co Chairman Bah Ransom Sutnga, la ïoh jingkren na ki Co Chairman Bah Embhahlang Syiemlieh, Bah Donbok Khymdeit bad kiwei kiwei kiba la pynpaw ka jingkmen ïa ka jingshimti u Bah Gavin kum u Chairman bathymmai bad pynpaw ruh ba ki kloi ban ïatreilang ha baroh ki liang ba donkam.
Ha kane ka sngi na ka liang ka Board of Directors bad ki nongtrei ki la pdiang burom ïa u Bah Gavin Mylliemngap da ki jingai sngewbha kiba bun ha ryngkat bad kiwei kiwei ki jingpdiang sngewbha.