Pyrshah jur ka JAC ïa ka jingthmu pynkynriah ïa ka Block ophis na Nonglang sha Tynghor

Nongstoiñ , Jylliew 14: Ka jingthmu jong ka sorkar ban pynkynriah ïa ka Block ophis jong ka Rimuliang C&RD Block na ka shnong Nonglang sha ka shnong Tynghor ka la pynbiatr lep ïa ki paitbah jong bun phew tylli ki shnong kiba hap hapoh katei ka Block.
Kumta na ka liang ki nongïalam jong ka Joint Action Committee Rimuliang C & RD Block kaba kynthup naduh ki nongshynshar shnong riew rangbah ki sengbhalang, seng longkmie , sengsamla shnong bad ki Village Organisation ha ka sngi saitjaiñ ka 13 tarik Jylliew ki la lum lang ïa ki paitbah na kitei ki shnong ban pynlong da ka jingïaid paitbah bad rah ruh da ki lama ïong bad ki banner ban pynpaw ïa ka jingpyrshah kaba jur halor katei ka jingthmu jong ka sorkar ban pynkynriah ïa katei ka Block ophis.
Ha katei ka sngi la sdang ïa ka jingïaid paitbah na ka shnong Umwahlang kaba jngai kumba ar kilomitar haduh ka madan jong ka shnong Nonglang hajan ka Block ophis ba shipor.
Ha katei ka sngi da ki hajar ki paitbah nongshong shnong ki la wan ban ïa shim bynta bad ban ïasnoh kti lang ban dawa ïa ka hok na ka sorkar ba ka dei ban pynneh ïa katei ka Block ophis ha ka shnong Nonglang.Haba la poi ha katei ka madan la pynlong da ka jingïalang ha kaba la pynïaid da u bah Trasdingland Nonglang uba dei u Chairman jong ka Joint Action Committee Rimuliang C & RD Block.
Ha katei ka sngi ki nongkren kiba la ïa shim bynta ki long u bah B.Nonglang sordar jong ka shnong Nongma, u bah Rusphulson Wanñiang nongïalam ka FKJGP Nonglang Unit, ka kong S.Shangdiar nonïalam jong ka Nonglang Village Organisation, ka kong E.Lyngdoh nongïalam jong ka Senglongkmie shnong Kyrdum, u bah Johness Synshiang secretary ka hima Nongmynsaw, u bah Shaphrang Lyngdoh uwei na ki riew rangbah na ka shnong Nonglang bad kiwei kiwei.
Kitei ki nongkren ha katei ka sngi ki la ong ba naduh ka por ka la ïaid kumba lai snem tam naduh ba la plie ïa katei ka Block opohis ha ka shnong Nonglang bad ki paitbah ki la ap khmih lynti tad haduh lano ka sorkar kan tei noh ïa ka ophis ba pura jong katei ka Block khnang ba kan pynsuk ïa ka jingtrei kam.
Ki la ong ruh ba kim shym pa poi pyrkhat ei ei ba ka sorkar kan don ka jingthmu ban pynkynriah noh sha kawei pat ka jaka hynrei dei tad haduh kine ki khyndiat taïew ba ki la ïohi lyngba ki lad patthai khubor ba u bah Prestone Tynsong Symbud Myntri Rangbah ka jylla ha ka jingïalap Election ha ïew Rambrai na ka bynta ka MP Election shiteng samoi ba u la ong ba na ka bynta ka Rabrai C &RD Block bad ka Rimuliang C&RD Block ka sorkar ka la dep khot tender bad shen yn sdang noh ban tei ïa kitei ki artylli ki Block ophis kata ha Rambrai bad ïa ka Rimuliang Block pat ha ka shnong Tynghor.
Katei ka jingkren jong u Symbud Myntri Rangbah jong ka jylla ka la pynkyndit thret ym tang ïa ki nongïalam jong ka JAC hynrei ïa baroh ki paitbah jong ki shnong ha katei ka thaiñ bad dei halor katei ka nongrim ba ki nongïlam ka JAC ki hap ban lum ïa ki paitbah ban pynpaw ïa ka jingpyrshah kaba jur halor katei ka jingkren lap lah jong u Symbud Myntri Rangbah.
Nalor kata ki nongkren ha katei ka sngi naduh ki rangbah haduh ki longkmie ki la ther tyngeh ïa ka sorkar kaba la nud ban shu wan pynbiej kai da kaba wan plie ïa u mawnongrim ha katei ka shnong bad plie ruh ïa ka ophis trei kam ba shipor da kaba kyrpad ïa kawei ka long ïng ba kan ai jaka ha ka ïng jong ka ka ba ka sorkar kan pynlong kum ka ophis trei kam ba shipor jong ka Rimuliang Block haduh ban kan da tei ïka opjs ba pura jong ka Block.
Ha kajuh ka por ki la ther tyngeh ruh ïa u bah R.G.Momin MLA bad u bah Lurshai Kharbani MDC ha kaba ki la ong ba hadien ba ki la ïoh jingtip ba ka sorkar kan pynkynraih noh ïa katei ka Block ophis na Nonglang sha Tynghor ki la leit ban ïa kynduh ïa kin a ka bynta ban wad ïa ka jingtip kaba thikna hynrei u bah Momin u la thet kti bad sait khuid ba um don jngtip ei ei ha kaba ïadei bad ka jingthmu ban pynkynriah ïa katei ka Block.
U bah shaphrang Lyngdoh u la ther tyngeh ïa u bah Momin da kaba ong ba baroh shi katta ki sngewtynnad eh ïa u namar haba u ai jingkren haman la ki jingïalang kum u MLA u ju pynshong nongrim na ka ktien u BLei namar ba u dei u Pastor hynrei mynta ki dak ki shin kiba paw ki pyni ba u dei pynban u Judas uba ar.
U la ong ruh ba lada u MLA um donbynta lang ban pynkynriah ïa katei ka Block ne ïa kino kino ki kam pynroi ba ka sokar ka ai sha ki paitbah jong kano lkano ka shnong ka sorkar kan ym nud satia ban leh da ka bor khlem ka jingmynjur jong u nongmihkhmat jong kata ka jaka.
Ha kajuh ka por u la ai nuksa ïa ka Shahlang C & RD Block ka la don ka jingïaknieh kaba jur bha hynrei u MLA ka Mawshynrut namar ba udei u briew u ba stad da kaba ai ka jubab kaba shai sha ki paitbah da kaba ong ïa kaba la dep thung ka kamram jong u kum u nongmihkhmat ka long ban nang pynskhem shuh shuh ym ban pynkynriah namar lada pynkynriah kan wanrah ïa ka jingïabishni para briew, ka jingïapeit khmat uwei hadien uwei pat bad ka pynmong ruh ïa ki ba bun ki nongshong shnong .
U la ong ruh ba ka jingleh jong u MLA jong ka Rambrai Jyrngam pat ka wan rah pynban ïa ka jingbym ïa snewtynnad para nongshong shnong , para thaiñ namar ki briew na ka shnong Tynghor bad Nonglang ki dei kiba ïatrei kam lang ha kiba bun ki bynta khamtam ha ki kam Balang namar ba ki hap ha kajuh ka Presbytery bad lada ka sorkar kan pynkynriah jubor ïa katei ka Block ophis na ka shnong Nonglang sha Tynghor kamut ba dei hi ka sorkar kaba thaw ïa ki jingpynklumar shnong bad kaba wan rah ïa ka jingbym shong suk shong saiñ ha baroh ki bynta jong ka jylla.
Nalor kata u la ong ruh ba katei ka jingïad paitbah bad ka jingïalang hakatei ka sngi ka dei tang ka jingsdang bad ka sorkar ka la dei ban pynshai mardor bad pynthikna la kan pynkynriah ne kan pynneh ïa ka Block ophis ha ka shnong Nonglang namar lada ka sorkar kam pynshai noh kloi ki nonïalam jongka JAC ki long kiba la pynkhreh ban leit tur sha ophis u Deputy Commssioner jongka West Khasi hills bad wat haduh Secrtariat ban dawa ïa ka hok.
U la ong ruh ban a ka liang ka JAC kam don jingrem ei ei ruh em namar ba ka ieng halor ka nongrim jong ka hok kumba ka sorkar ka la dep wan plie ïa u mawnongrim bad wan ai ïa ka Block ophis ha ka shnong Nonglang kam don hok shuh ban dang shim ïa kaba ka la ai.Khatduh eh u la kyntu ïa ki paitbah ba kin long kiba la khreh bad kiba la kloi ban tur shkhamt pyrshah ïa ka sorkar lada kam sngap ïa ki jingdawa jong ki.