Lap ki briew ïa arngut kiba ïap ba sdien ha u tyllai hapoh kawei ka ïing hajan Lumsohphoh

Shillong, Jylliew 14: Mynta ka sngi ha ka por mynstep ki briew ki la lap ar tylli ki met ïap hajan kawei ka dukan rit ha jingkieng Nongthymmai, kaba hab ha Lumsohphoh ha kaba kawei dei jong u samla briew bad kawei dei jong ka samla briew kaba la lap ba la ki la sdien ha u tyllai.
Katkum ka jingïathuh jong u Superintendent of Police ka East Khasi Hills u Bah Vivek Syiem (IPS) u la ïathuh ba ki pulit ki la lap ïa kitei ki arngut ha ka por kumba 7 baje mynstep ba ki la sdien da tyllai hapoh kawei ka ïing kaba hajan shnong Lumsohphoh mar shilliang jong ka surok Shillong Jowai.
Ïa kine ki briew la ithuh kyrteng kum ka samla Pronome Hajong ba la 22 snem ka rta napoh ka shnong Balat SWKH bad u Semanto Hajong ba la 21 snem ka rta na ka shnong Ranikor SWKH.
Ïa ki met jong kitei ki arngut la pynkit noh sha NEIGRIHMS na ka bynta ban pyndep ïa ka post mortem. Katkum ka jingtohkit la kdew ba ka dei ka jingshim noh ïa la ka jong ka jingim bad ban pynshisha ban pynskhem ïa kane ka shong hadien jong ka jinglap lyngba ka Post Mortem report. La pynhab ïa kane ka jingjia hapoh ka UD case kaba la register ruh hapoh Laitumkhrah Police Station, ong u SP ka East Khasi Hills District.