Da ka “(L) Helimaya Kharrngi Special Award” pynkup burom u bah Lambor ïa ka Topper ha SSLC

Shillong, Jylliew 14: U MLA bad MDC barim ka Nongkrem Constituency u Bah Lambor Malngiang ha ka sngi Saitjain u la pynkup burom ba kyrpang ïa i topper ha ka eksamin SSLC bad kumjuh ruh ïa baroh ki khynnah kiba la pass bha bad ioh distinction ha ki sopjek bapher bapher.
Kane ka award ba kyrpang ba la pynkup burom u Bah Lambor la tip kum ka ‘Late Helimaya Kharrngi Special Award’ bad ka leit sha iwei na ki khynnah jong kane ka skul ba long topper i Ishahaphi Nongpluh.
Ïa kane ka jingpynkup burom u Bah Lambor u la leh ha ka sngi Saitjain ha ka por ba u leit ban plie ïa ki kamra Class ba thymmai jong, Ka Salem Higher Secondary School kaba u la pynioh na ka CMSDF 2024-2025.
Haba kren ha kane ka sngi na ka liang u Bah Lambor Malngiang u la ong ba ka Salem Higher Secondary School ka long kum ka bynta jong ka ïing ka sem jong u, ka jingïajan naduh ki por ba mynshuwa haduh mynta ka dan ïai g bteng.
U la ong ruh ba ka pule puthi ka dei kawei na kiba don kam tam ha kane ka juk ba mynta, u la ïaroh ruh ïa ka sap ka phong ba ki khynnah skul ki don la ka dei ha ka rwai ka siaw ne kiwei.U la kyntu ïa ka skul ban ai daka jingthoh ba un ioh ban phah sha u Myntri Rangbah ka Jylla u Conrad Sangma ban mang pisa na ka bynta ki jingdonkam ka skul ha ka put ka tem.
U la bynrap da kaba ong ba ki kmei ki kpa ki shaniah ïa kane ka skul, na kata ka daw ki phah ïa ki khun hangne, kane ka skul ka don ïa kata ka jinglah jong ka wad ban ïa nujor bad ki skul kiba don ha nongbah Shillong.
U la ai ka jingiaroh ïa u Myntri Rangbah ka Jylla uba la phai khmat bha ha ka pule puthi bad pyrshang ban kyntiew ruh ïa sap ki khynnah pule lyngba ka put ka tem kaba u la bhah kyrpang.
U bah Lambor u la kitbok kitrwiang ïa baroh ki khynnah kiba la shah pynkup burom hynne ka sngi kiba la pass bha ia ka eksamin HSSLC bad SSLC.