Ki district council ki dei ban ïaid shakhmat ban tohkit ïa ki nongsynshar shnong ne Hima balei kim khot dorbar

Ha ki khyndiat bnai ba ladep, ka Khasi District Council, ka la weng ïa ki katto katne ngut ki khlieh nong synshar bad kitei ki kynthup ïa U Syiem ka Hima Langrin bad nangta ïa U Syiem ka Hima Mylliem. Nangta ha ka Lah Sngi U Blei, ka Council, ka dang shu khot ïakren, ïa U Sirdar ka Elaka Mawlong, ba un khot noh kloi ïa ka dorbar jong katei ka Elaka, kaba um shym la khot, la shiphew snem antad.
Halor kane ka mat, ka wan biang ka jingpynkynmaw ïa ki sur jong U Myllung Soso Tham, ha kaba ula ong “U Syiem kam pher, la dei u maw, ki Hima kiba u rit u khraw” bad kane hi ka jingkren ka thew shai, ba ka jingsynshar ïa ki Hima, ki Elaka bad wat ha ki shnong ki thaw, kam dei satia ha ka bor jong U Syiem ne U Sirdar ne U Rangbah Shnong, hynrei ka dei ha ka bor jong u paid nongshong dorbar.
Ha kine ki sngi pat, la ïohi, ba ka jingsynshar jong ki Hima, ki Elaka, ki Raid bad wat ki shnong, kiba ju shim hi ïa ka rai ban pynïaid kam dalade hi lane da ki katto katne ngut bad kane kam dei satia, na ka rukom synshar khadar, jong ki Hima Khasi bad ngim dei ban klet, ba U Syiem Tirot Sing, u da pynlut por bun sngi ban shong dorbar, lada dei ha kaba shah ïa ki phareng ban tih surok lane lada dei ban beh noh ïa ki, na katei ka Hima.
Kat haduh mynta, ngim pat ju ïohsngew ïa ki Hima Khasi, kiba khot dorbar ïa u khun u hajar, lait noh ka Hima Mylliem, kaba khot ha ki phew snem mynshwa bad kata ruh tang shisien hi tnok bad kumjuh ki don ki Elaka ne ki shnong ruh, kiba ïaid da katei kajuh ka buit, ha kaba ki ïa treikam katba mon bad haba ïoh ïa ka dud bad ngap, ki ïa bam hun dih hun dalade bad tang shu la poi shaba sniew, hangta, ka sa mih ka jot ka pra jong ki Hima, ki Elaka.
Ki District Council, ki dei ban skhem beit triang halor ki ar tylli ki mat bad kawei na kitei ka long, ka jingsiew ïa ka bhah kaba ki ong shi bynta na ka phra bynta jong ka kamai jong ki Hima bad ki don bun ki Hima bad ki Elaka, kiba lah ban leh ïa kata bad nangta, sa ka jingkhot ïa ka dorbar pyllun kaba shisien shisnem, khamtam ka por ban ïakheiñ ïa diah bad lada ki don ki khlieh nongsynshar, ki bym bud ïa kitei ki kyndon, kumta ïa kitei dei ban weng mardor bad ka kyndon kaba biang eh, ba ka Council, kan tyngkhap, ka long ba ha man ki jingthoh jingtar jong ki Hima ne ki Elaka, ki dei ban pynrung ïa ka kyntien U Syiem/Sirdar bad ka dorbar, haba shim ïa kino kino ki rai.
Nangta ki district council kidei ruh ban da wad ïa ki jingtip kiba thikna, nalor ka jingbym siew ïa ki bhah badei da ki hima sha ka, nangta ka jingbym khot dorbar hima ïa ki khun ki hajar ha shwa ban die jaka sha ki nongwei kynthup ki kompeni, ki shipai bad kiwei kiwei da kaba shu shah pynbeij pisa ne kiwei pat ki jingshah thok, hynrei kadei ruh ban wad jingtip katno tylli ki jaka puta ki Khasi ba la shah die duh bad shano kane ka pisa ka leit bad mano ba ïoh jingmyntoi.
Nangta ki district council kidei ruh ban tih Jylliew katno ngut na ki nongmihkhmat paidbah kiba la ju pynlong ïa ki Hima kum ki ATM ban jop ne ïakhun elekshon bad ha kano ka rukom ruh la pynskhem ne thung pura ïa ki Syiem kiba la ïoh shong shuki da kaba suk khlem da don ki elekshon katkum ki riti dustur jied Syiem bad kiwei kiwei pat.
Kumba ai nuksa ka jingleh jong ka KHADC ban tohkit ïa kiba bun ki nongsynshar shnong ne Hima ka long shisha kaba dei bha namar mynta lah da ki phew phew snem ym ju don satia ki EC ba la synshar da ki seng saiñ pyrthei kiba kwah ban pynbeit ïa kum kine ki kynrum kynram kiba la ju ïai jia naduh ki phew phew snem mynshwa bad ba ki nongsynshar shnong ne Hima ki ïoh ban leh katba mon da kaba shu trei bad pyndep ïa ki kam tang ban shu pynhun ïa ki MDC ne MLA, hynrei khlem pyrkhat shuh ïa ki jingeh jong ki khun ki hajar bad khamtam eh kaba la wanrah ka jingeh ïa kane ka pateng mynta ban pynbeit ïa u pud u sam ka jylla.