Pynkup burom ka MBCC ïa u samla Banlamjingshai ba khur takma ksiar ha ka National Championship

Mylliem, Jylliew 14: Ka Mylliem Block Congress Committee (MBCC) ha ka sngi Saitjaiñ ka la pynlong ïa ka prokram pynkup burom ïa u Samla Banlamjingshai Syiem, uba la wanrah nam bad burom ïa ka jylla Meghalaya da kaba khur ar tylli ki takma ksiar ha ka 4th National Armwrestling & Para Armwrestling Championship 2026 kaba la long ha Gujarat.
Ïa kane ka prokram la pynlong ha Mylliem Madanïingsyiem ha ïingsah jong u Samla Banlamjingshai, ha kaba la wan ban sakhi lang da ki nongkitkam jong ka MBCC, ki longkmie ki riew rangbah, ki khun samla, ki bahaïing hasem jong u Banlamjingshai bad ki paidbah nongkyrshan.
La pynïaid ïa ka jingïalang da u bah Kyrshanbor Simon Paswet, General Secretary, Mylliem Block Congress Committee, uba la pynpaw ïa ka jingsngew sarong halor kane ka jingjop. Kum ka dak jong ka jingithuh bad ka jingsngewnguh ïa ka jingjop na ka liang jong ka MBCC ka la pynkup burom ïa u da ka jaiñkup Ryndia bad ka memento.
Haba kren ha kane ka jingïalang, u Bah Lionel Nongkhlaw, President ka MBCC, u la pynpaw ïa ka jingsngewkmen bad jingsarong kaba khraw halor da kaba ong, “Ka jingjop jong u kam dei tang ka jingjop shimet hynrei ka dei ka jingjop jong ka Constituency bad ka Jylla hi baroh kawei”.
“Wat hapdeng ki jingeh ba u mad ha ka jingim, u Banlamjingshai um shym la ailad ïa kitei ki jingeh ban pynduh mynsiem hynrei u la pyni sha ka pyrthei ba ka jingngeit ha U Blei, ka jingïaishah bad ka jingtrei shitom ki lah ban pynurlong ïa ki jingthmu bad ki jingangnud jong u briew,” la bynrap u bah Lionel.
U la ban jur ba kane ka jingjop kan long ka buksa ïa ki para samla jong ka shnong bad ïa ki samla ka jylla baroh kawei ba kin long kiba minot, kiba skhem jingmut, la ka long ha ka sports, ha ka pule puthi ne ha kino kino ki bynta jong ka jingim.
Ha kane ka prokram, la ïoh ruh ka jingai khublei na u Samla Bah Banlamjingshai. Namar ba u dei uba duna ha ka bor ïohsngew bad um lah ban kren, ïa ka jingsngew jong u la pynpaw lyngba ka sign language, bad la pynkylla pat da i para jong u, iba la shah hikai kyrpang ban sngewthuh bad ban pynkylla ïa ki dak jingïakren jong u.
Na ka liang jong u samla Banlamjingshai, u la pynpaw ka jingsngewnguh ïa ka Mylliem BCC kiba la ai burom bad ithuh ïa ka jingtrei shitom jong u bad pynpaw ba kane kan nang pynshlur ïa u ban trei shitom shuh shuh ha ki jingïalehkai ki ban sa wan.
U la kyrpad ruh ba kin ai ka jingïarap bad jingïatylli lang khnang ba un lah ban ïoh ïashim bynta ha ki jingïakob jong ka kyrdan International Championship ha ki sngi ban wan.