Ka jingkiew ha ka ïoh ka kot ka dei ban wanrah ka jingkylla ba shisha ïa ka jingim ki paidbah, ong u CM ha ka NITI Aayog

Shillong, Jylliew 12 : U Myntri Rangbah ka Jylla Meghalaya, u Conrad K. Sangma, ha ka sngi Thohdieng u la ban jur ba ka jingkiew ka ïoh ka kot ka dei ban wanrah ïa ki jingkylla kiba shisha ha ka jingim jong ki paidbah da kaba kdew ruh ïa ka thong jong ka jylla kaba la ai kyrteng “Transformation Journey 2032” ha ka jingïalang bad ki Myntri Rangbah jong ki jylla ka thaiñ Shatei Lam Mihngi ba la pynlong da ka NITI Aayog.
Ha kane ka jingïalang kaba la khot da ka NITI Aayog, u Conrad u la ban jur halor ka jingïadei hapdeng ka jingkiew ka ïoh ka kot bad ka jingroi jong ki paidbah.
“Ka jingkiew ka ïoh ka kot ka dei ban pynlong ïa ka jingroi kaba shisha ha ka jingim jong ki paidbah,” u la ong haba kdew ïa ka jingïohi jngai jong ka Meghalaya ban poi sha ka thong jong ka Viksit Meghalaya ha u snem 2032.
U Myntri Rangbah u la kdew ruh ïa ka bynta kaba kongsan jong ki projek kiba ïoh jingïarap pisa na shabar ban tei ïa ki jingdonkam kiba kongsan jong ka jylla.
“Ki Externally Aided Projects ki la noh synñiang shibun eh ha kaba shna ïa ki jingtei kiba kongsan bad ha ka jingïarap ban pynsted ïa ka roi ka par,” la ong u Conrad.
Da kaba pan ïa ka jingïatreilang kaba kham khlaiñ hapdeng ki jylla ka thaiñ Shatei Lam Mihngi, u Conrad u la kyntu ban don ka jingïatreilang kaba kham jan ha ki kam khaii pateng bad khamtam eh haba dei ban pynneh pynsah ïa ka mariang.
Ha kane ka jingïalang, la wan ban shim bynta lang naduh u Vice Chairperson ka NITI Aayog u Ashok Lahiri, nangta ki dkhot, u CEO bad ki Chief Secretary na baroh phra jylla ka thaiñ Shatei Lam Mihngi kiba kynthup ïa Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura.
Ka jingïalang ka la ïakren bniah halor ki mat ba kongsan jong ka roi ka par, ki lad thymmai bad ki jingeh ha ki bynta bapher bapher kum ka rep ka riang, ka koit ka khiah, ka pule puthi, ka kam jngohkai pyrthei bad ka jingtei ïa ki jingdonkam paidbah.
Ki Myntri Rangbah jong kiwei pat ki jylla ruh ki la pynpaw ïa ki mat ba ki jylla jong ki, ki la shimkhia.
U Myntri Rangbah ka Arunachal Pradesh, u Pema Khandu, u la kdew ïa ka bor ba lah ban pynmih na ka um bad ïa ki sienjam synshar paidbah kum ka “Sarkar Aapke Dwar”.
U Myntri Rangbah ka Assam, u Himanta Biswa Sarma, u la ban jur halor ka roi ka par kaba ïaryngkat bad kaba kynthup lang ïa baroh.
U Myntri Rangbah ka Mizoram, u Lalduhoma, u la dawa ban kham pynjynsur ha kaba ïadei bad ki skim ba wan na ka sorkar pdeng.
Katba u Myntri Rangbah ka Nagaland, u Neiphiu Rio, u la dawa ban pynbha ïa ki lynti syngkien bad ruh ban pynïaid iew ïa ki mar rep ba kongsan na ka jylla kum u kophi Nagaland.
Ha ka jingkren pynkut, ka dkhot jong ka NITI Aayog, ka Joram Aniya, ka la ai khublei ïa ki jylla baroh kiba la sam ïa ka jingkiew bad ki mat ba ki shimkhia ha ki jylla jong ki.
“Ka NITI Aayog kan ïai bteng ban trei lang bad ki tnat sorkar ba dei peit jong ka Sorkar India ban pynsuk ïa ka roi ka par jong ki jylla ka thaiñ Shatei Lam Mihngi,” ka la ong.