Ki Sahep kin hap ïatreilang bad ki Dorbar Shnong ym ban set marwei hapoh ki kamra: DP Wahlang

Shillong, Jylliew 12: Ban pyntyllun ïa ki kam bapher bapher jong ki tnat sorkar ha ka jylla donkam bha ïa ki nongtrei kam Sorkar bad ki ophisar ban ïasyllok bad ki dorbar shnong, ki nongïalam shnong bad ki nongshong shnong, ym ban shu long beit tang marwei hapoh ki kamra treikam, ong u Chairman ka Meghalaya State Food Commission u Bah D P Wahlang, IAS (Rtd) bad u Chief Secretary barim haba kren kum u kongsan ban plie ïa ka 1st Annual Conference jong ka Meghalaya Administrative Training Institute (MATI), kaba la long hapoh Hotel Vivanta Shillong, halor ka phang ‘Reflections’, kaba la long ha ka sngi Thohdieng.
U la ong ba ki ophisar bad ki nongtrei Sorkar ki donkam bha ban ïajan bad ki nongshong shnong khnang ban sngewthuh kumno ban pynïaid ïa ki kam kiba kongsan.
U la ïathuh ruh ba ha ki por mynshwa haba u shimti nyngkong eh kum u SDO Civil ha Mairang um don jingtip eiei shaphang ki file, ym don mano mano ruh kiba ai jingtip shaphang ki file, kumta mynta lyngba ka jingai jinghikai hapoh ka MATI ka la ïarap shibun naba kane ka juk mynta ka dei ka juk degital, AI bad kiwei kiwei ki jingkylla thymmai kiba myntoi bha.
U la ai jingmut ruh ban don kiwei kiwei pat ki jaitkam na ka bynta ki ophisar kum ki kam kilan met, nangta ban shem thymmai bad khamtam eh ban pynïaid ïa ki kam lyngba ki jingbuh jingkheiñ bad lum jingtip, nangta ban ïatreilang bad ki kynhun ha ka imlang sahlang bad kaba donkam bha ka long ban pynïar ïa ka shnat treikam ka MATI sa sha Tura ka thaiñ Garo Hills ban ai jinghikai ïa ki nongtrei, ki ophisar kiba don shajngai na Shillong.
U la pynpaw ba lyngba ki jinghikai ba ai da ka MATI kan ïarap ban shakri ha ki snem ban wan naba ki jingïoh jinghikai kidei ban wanrah jingkylla.
Katba u Director ka MATI u Swapnil Tembe, IAS u la ai ïa ka kaiphod ba shisnem ki rukom treikam jong ka MATI ha kaba u la ïathuh ba na ka 50 hajar tam ka jingdon ki nongtrei Sorkar, ka MATI ka la lah ban pyndep haduh 247 tam ha ki jingai jinghikai ha ka shisnem bad palat 7802 ngut kiba la shimbynta. Ha kane ka sngi la ïoh ka jingkren na u Dr. Bijoy A Sangma kum u Guest Speaker uba la ong ba ka jinghikai kam dei tang ban ïoh syrnot ne kiwei kiwei pat, hynrei kadei ban pynmih ïa u soh jong ka jingkylla.
Ha ka prokram u kongsan u la pyllait ïa ka Annual Training Calendar 2026-27 bad ka kot lyngkdop, nangta ka jingplie ïa ka integration of certificates of training halor ka DIGILOCKER bad ka jingsam ïa ki khusnam sha ki 12 ngut kiba la shah hikai bad 10 ngut pat kiba la lehbha halor ka rynsan Integrated Government Online Training (IGOT).