Shibun ki jingthung kiba lah ban shna ki tiar jingiwbih ki don ha WKH: Dr.Ramesh K. Shrivastava

Nongstoiñ, Jylliew 12: Ka Central Institute of Medicinal & Aromatic Plants na Lucknow, ryngkat ka jingai jingkyrshan lang da ka Meghalaya Basin Management Agency (MBMA), mynta ka sngi ka la ïoh ban pynkut noh ïa ka jingai jinghikai shaphang ka rukom shna Sabon, Dhup, Candle, Perfume, Facewash bad kiwei kiwei ïa kaba la pynlong naduh ka 9 tarik u Jylliew 2026 bad kaba la neh haduh lai sngi lynter.
Katei ka Programe kaba la long ha Mawshynrut Civil Sub Division, la tip kum ka ‘Hands on Training Programme on making of value added products based on essential oils available in Meghalaya’, la wan ban ïashimbynta da ki phew ngut ki briew kynthup ïa ki kynthei bad shynrang.
Ïa kitei la wan ban ai jinghikai da ka Dr.Priyanka Singh na ka Central Institute of Medicinal & Aromatic Plants, ryngkat ka jingïadonlang ruh u Dr.Ramesh K. Shrivastava FNASC, Senior Principal Scientist & Professor (AcSIR), u ba dei uwei na ki nonglamkhmat katei ka kynhun ai jinghikai, kiba la ïoh ban pyni ruh kumno ban khleh ïa ki kynbat Khasi na ka bynta ban shna ïa ki jingsynreit ba pyniwbih.
U Dr.Ramesh K. Shrivastava u la pynpaw ka jingsngewkmen shibun halor ka jingkynrei ki jait jingthung ba bun phew jait bun phewr rukom.U da ong ruh ba ha ka jingwad jingtip bniah ka jong u, u la lap ba don shibun ki jingthung kiba lah ban shna ki tiar jingiwbih ki don ha West Khasi Hills District.
Ha kane ka sngi la ïoh ban sam ruh ïa ki syrnod sha kitei kiba la wan ban ïashimbynta ha katei ka Training bad la pynlong ïa katei ka jingïalang ha Prime Hub kaba don ha ka shnong Porshih Mawshynrut, West Khasi Hills District.
Hadien katei ka jingïalang utei u saïantis haba ïoh ban ïakren bad u nongthoh khubor, u la ong, “Ka West Khasi Hills District ka don shibun ki jingthung kiba lah ban ai jingmyntoi kum u lemon grass bad kiwei kiwei kiba lah ban shna ïa ki tiar jingiwbih kum u dhup, u sen, u sabon bad kiwei kiwei. Haba ka jylla ka don ïa kine ki tiar ngam artatien ei ei kan ai ka kamai kajih ïa ki briew jong kane ka jaka”.
Kawei na ki nongshah ai jinghikai, kata ka kong Meshalin Nongbak na Nongdaju ka la ong, “Bun bah ki jingthung kiba ngi ju ïohi ba ki don ha kane ka khyndew jong ngi. Hynrei ngim ju tip ba ki dei ki kynja kynbat kiba lah ban ai jingmyntoi ïa ngi ban kamai ja kpoh bad ban pyndap ïa la ka ïing ka sem da kaba ïeng ha la ki kjat ha kum kane ka juk kaba hiran ha ka kamai kajih”.
“Nga ngeit skhem ba lyngba kane ka prokram ai jinghikai kan ka jingmyntoi bad kumjuh ruh ba ka Central Institute of Medicinal & Aromatic Plants, kan nang shimkhia shuh shuh khnang ba kan long ka jingmyntoi khamtam eh na ka bynta jong ngi kiba don sha kane ka dong ka thaiñ”, ka la ong.