Ka sorkar ka dei ban khmih bniah shwa ban pyntreikam ïa ka ILP bad MRSSA ha ka jylla : A L Hek

Shillong, Jylliew 11 : U Nongïalam ka BJP bad MLA ka Pynthorumkhrah Bah AL Hek ha ka Sngi Balang ula kyntu ïa ka Sorkar Jylla ba kan pynlong ïa ka jingkhmih bniah ïa kaei kaba lah ban leh bad ka bym lah ban leh hashuwa ban pyntrei kam ïa ka Inner Line Permit (ILP) bad ka Meghalaya Residents Safety and Security Act (MRSSA) ha Jylla.
Kat kum ka jingong jong u, kano kano ka aiñ ka dei ban pynbiang tarajur ïa ka jingmyntoi jong ki nongshong shnong bad kito kiba wankai sha ka Jylla.
Haba kren sha ki nongthoh khubor, u Bah Hek ula ong ba ka jingphaikhmat ka dei ban long halor kaei “kaba lah ban leh” bad ki jingmyntoi ïa baroh ki kynhun bapher bapher.
“Haba ïadei bad ka ILP bad MRSSA, Nga kyrpad ïa ka Sorkar Meghalaya bad ki paidbah ka Jylla ba haba ngi kwah ban pyntreikam ïa ka ILP lane MRSSA ha Meghalaya, nyngkong ngi dei ban khmih ïa kaei kaba lah ban leh. Kaei kaba lah ba ngin leh bad kaei kaba ngim lah ban leh” ula ong.
Ula bynrap ba ka jingpyrkhat ba nyngkong eh ka dei ban long ïa ka bha ka miat jong ki paid nongshong shnong ka Jylla, haba pyrkhat ruh ïa ki briew ba nabar, khamtam ki nongjngohkai.
“Kumta, ka bynta kaba lah ban leh ka dei ban long ka jingmyntoi ïa baroh ki briew, ym tang ïa ki nongshong shnong ka Meghalaya. Nyngkong ngi hap ban khmih ïa ka jingmyntoi jong ki paidbah ka Jylla bad ruh, ngi hap ban khmih ïa ka jingshngaiñ bad jingmyntoi jong ki briew kiba wan sha Jylla khamtam ki nongjngohkai” ula ong.
Haba kylli ïa ka lynti ba shakhmat, u Bah Hek ula kyntu ban pynlong ïa ka jingwad bniah kaba janai bha ban pynthikna ba kano kano ka aiñ kam dei ban ktah ïa ki nongshong shong ba rit paid ka Jylla lane pyrrkhing ïa ki nongwankai.